Turecke placki ze szpinatym (Gözleme ispanakli)

Niyrołzki1 , jak moł2 przijś bezuch3, to sie ich pytōm, ze jakego regiōnu chcieli by cojsik zjejś4… Kōmratka5 padała6 : Turcja i trza bōło sie trocha naszukać, naôglōndać, poeksperymyntować, ale na kōniec te placki tak mi zasmakowały, że na zicher7 byda je zajś8 kedy rychtować9.

Co potrza?

Ciasto:

2 szklōnki mōnki pszynnyj

1 jajco

pó łeżeczki soli

2 łeżki jogurtu naturalnego

trocha wody

Filowanie:

200 g fety

400-500 g szpinatu10 – moge być mrożōny

połra łeżek oliwy

kolorowy pieprz

Składniki ciasta wciepcie11 do miski i wyrōbcie. Jak już ciasto bydzie jak plastelina, to je przikryjcie we misce i niech sie trocha ôdpocznie- aby ze 10-20 minut.

Szpinat ze kapkōm oliwy, fetōm i pieprzym wciepcie na patelnia i niech to sie trocha ôdparuje.

Wejście sie mały kōnsek ciasta, na biyrkownicy (stolnicy) wysujcie trocha mōnki i nudelkulōm fajnie ta kulka łozkulejcie. Jak już bydziecie mieli sroge12 kōłko, to pozaginejcie dwa przeciwległe kōnski trocha do środka (tak ze 3 cm) i sie nōm zrobi choby prostokōnt. Tera na środku posmarujcie oliwōm, wciepcie trocha farszu i go fajnie łozprowadźcie. Niyskorzi13 trza yno pozaginać do środka te dwa zaôkrōnglōne kōńce i nōm się zrobi już prawie kwadrat. Posklejejcie ze sobōm wszyjske łōnczynia i wciepcie tyn placek na łozgrzōno patelnia. Połobrocejcie go połra razy ze jednyj strōny na drugoł, żeby sie dobrze przibrōnołciōł i mogecie sie brać za jedzynie. Smacznego 🙂

1czasem

2ma

3goście

4zjeść

5koleżanka

6powiedziała

7na pewno

8znów

9przygotowywać

10szpinaku

11wrzućcie

12duże

13później

Sam tyż mogecie mie znojś:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*