Chlyb na dōmowych drożdżach




Jak narychtować1 dōmowe drożdże, znojdziecie sam: https://chopwkuchni.pl/?p=1529 A jak sie już je moł fertich2, to nojlepi upiyc chlyb.

Co potrza?

4 szklōnki mōnki pszynnyj (nojlepi 750, ale jak niy bajecie3 umieli taki znojś we sklepie, to moge być i 500 abo 550)

2 szklōnki mōnki pszynnyj razowyj (szklōnka moł tak ze 120 g)

porcja dōmowych drożdżōw

2 łeżeczki soli

2 szklōnki wody

łeżeczka cukru

Nojprzōd do miski idzie szklōnka wody, szklōnka mōnki pszynnyj, krauza4 drożdżōw i łeżeczka cukru. Dobrze to łozmiyszejcie i odłōżcie w jake ciepłe miejsce. Joł zawsze sie łozgrzeja5 bratruła6 na 50 stopni, wyłōncza jōm i wrażōm7 tam miska ze zaczynym. Przi takich drożdżach te ciasto potrzebuje ździebko8 wiyncyj czasu, joł żech to ôdstawiōł na 2 godziny- te wszyjske bakterie muszōm mieć czas na prokreacja 😉

Potyn do tego przidōm 3 szklōnki mōnki pszynnyj, 2 razowyj, sōl i szklōnka wody. Fajnie to wyrōbcie i przełōżcie do naczynia żaroodpornego, kere nojlepi wyłożyć papiōrym do pieczynioł. Przikryć i ôdłożyć do ciepłego miejsca na 2 godziny. Choć tak po prołwdzie mogecie sie to tyż dać do kyksōwki i bez przikrycia potyn wrajzić do tyj leko nagrzōnyj bratruły.

Na kōniec ôstało nōm pieczynie. Bratruła łozgrzyjcie na 230 stopni i wrojście tam nasz chlyb na 10 minut. Potyn zmniyjszcie na 200 stopni na nastympne 10 minut. Niyskorzi 40 minut niech sie ôn piecze na 180 stopni. Jak baje upieczōny, to go wyciōngcie9, dejcie10 na kratka, żeby sie ochōdziōł i za pó godziny mogecie sie za niego brać. Smacznego 🙂

1przygotować

2gotowe

3będziecie

4słoik

5rozgrzewam

6piekarnik

7wkładam

8nieco

9wyjmijcie

10połóżcie




2 Komentarze

Dodaj komentarz

Twój adres email nie zostanie opublikowany.


*