Chlyb pszynny z gorka




Jak żech tyn chlyb wyciōng1 ze bratruły2 i żech go powōnioł3, to już chciołech w niego wbić zymbska4. Tyn smak przipōmni Wōm nojlepsze chleby z czasōw, jak żejście byli bajtlami5, a ta chrōpiōnco skōrka… marzynie. Yno trocha masła i nic wiyncyj niy trzy… chyba, że dobry fet6 😉

Co potrza?

750 g mōnki pszynnyj (zorta7 750)

10 g soli (2 łeżeczki)

25 g drożdży

2 łeżeczki cukru

2 łeżki masła (50 g)

0,5 litra ciepłyj wody

Wlyjcie do miski woda i łozpuśćcie8 w ni drożdże. Potyn dejcie do tego łozpuszczōne masło, cuker, sōl i wymiyszejcie. Na sōm kōniec wciepcie tam mōnka, wyrōbcie to trocha, przikryjcie foliōm i wrojście na noc do lodōwki- sie ździwicie, jak to tam baje9 rosło 😉

Na drugi dziyń wysujcie10 na blat trocha mōnki, przeciepcie na nia ciasto i bez połra minut je wyrobiejcie. Potyn na dōł miski wsujcie trocha mōnki, ze ciasta zrōbcie kulka i wrojście jōm do tyj miski- po wiyrchu tyż mogecie to posuć11 trocha mōnkōm. Odstołwcie to na 90-120 minut w jake ciepłe miejsce. Joł łozgrzywōm na chwila bratruła, wyłōnczōm i wrołżōm12 tam ta miska.

 

Jak już wyrojśnie, to do bratruły wrojście naczynie żaroodporne abo brytfanka, we keryj bydziecie piyc tyn chlyb i łozgrzyjcie piec do 220 stopni. Wyciōngcie naczynie, wciepcie dō niego chlyb, przikryjcie i wrojście do pieca. Bez 10 minut niech sie to piecze na 220, potyn 20 minut na 200 stopni. Jak już minie tyn czas, to ściōngcie pokrywka ze tego naczynia abo brytfanki i niech sie to jeszcze tak popiecze bez 20-30 minut. Musicie wachować13, jak wyglōndo skōrka- keby bōła za jasnoł, to bydzie potrzebowoł tyn chlyb niy 20, a 30 minut. 

Jak już bydzie fajnie przibrōnołcōny14, to wyciōngcie go ze bratruły i brytfanki i niech sie fajnie ochōdzi na jaki kratce. A potyn to już yno… smacznego 🙂

 

 

 

1wyjąłem

2piekarnika

3powąchałem

4zęby

5dziećmi

6smalec

7typ

8rozpuśćcie

9będzie

10wysypcie

11posypać

12wkładam

13pilnować

14przypieczony




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*