Siymieniotka abo siymiōnka, abo konopiatka, abo konopianka… ;) (Śląska zupa wigilijna)

Ta zupa na stole we Wilijŏ¹ brała sie z tego, że bōła tōnio² i kŏżdy sie mōg³ jōm lajstnōńć⁴. Jak to ze takimi daniami je, w kŏżdyj chałpie rychtowało⁵ sie jōm inakszyj. U moji Mutry⁶ w dōma bez pó dnia łonaczōła⁷ jōm Babka Mari, kero bōła siostrōm ôd⁸ moji Ōłmy⁹. Moja Muter już tego niy rychtowała, a jo sie do tego zabiyroł całe lata, aż mie sie w kōńcu udało. Jŏ żech sam trocha wynołkwioł¹⁰, ale zawsze sie mogecie narychtować jōm tradycyjnie: yno kōnopie, woda, mlyko, cebula, sōl, cuker, trocha mōnki i jako kasza.

Co potrza?

20 dkg siymiynia konopnego- niy bōjcie się, to na zicher niy je marihuana i niy bydziecie mieć z tego ôdlotu nawet, jak zjycie 3 talyrze tyj zupy

1 szklōnka mlyka

1 cebula

2 łeżki masła

sōl i cuker

Całŏ reszta to już sōm roztomajte wynołkwiania:

kasza- niyftorzi dŏwajōm upranżōno gryczanŏ, inksi jynczmiynnŏ abo jaglanŏ, jŏ żech poszoł na łatwizna i żech doł uprażōne płatki ze kaszy gryczanyj

trocha mōnki do zagynszczynia (mie to niy bōło potrzebne)

prziprawy- to już je takŏ moja wersyjo: połra gojździkōw, połra kulek ziela angelskego, ździebko¹¹ cynamōnu i gałki muszkatałowyj

2 łeżki miodu

Zalyjcie te siymie gorkōm wodōm i powarzcie 5 minut. Potyn wylyjcie piyrszo woda (a ś niōm¹² i trocha goryczki), dolyjcie do siyminia 1,5 litra świyżyj i dejcie tam ździebko soli i cukru. Terŏzki trza to warzić tak dugo, żeby te ziorka popynkały- godzinka Wōm na spokojnie na to śleci¹³. Za starego piyrwy¹⁴ trza to bōło ôdlŏć i potyn jakim tuczkym wyciskać połra razy „mlyko” z tych ziorek. Jŏ żech je na to za zgniōły¹⁵… Wloł żech to wszyjsko do blyndera, a potyn dwa razy żech to przecedziōł bez sitko. Woda ze mlykym kōnopnym wlyjcie nazod do gorka. Terŏzki niyftorzi zagynszczajōm to mōnkōm, ale mie sie to niy zdało¹⁶, bo żech sie to zagyńściōł niyskorzi płatkōma gryczanymi.

Na patelni na maśle zeszklōł żech cebula, a potyn do tego dociep żech jeszcze prziprawy, chwila to sie tak podpiykło i żech to dociep do gorka. Dolyjcie ku tymu¹⁷ jeszcze szklōnka mlyka. Potyn idzie to dosmakować solōm, cukrym abo miodym. Mogecie sie do tego uwarzyć jako kasza: gryczanŏ, jynczmiynnŏ abo jaglanŏ. Joł żech doł płatki ze kaszy gryczanyj, dwa razy zamiyszoł i bōło fertich.

Smak mŏ to specyficzny, leko goryczkowy, choć z tymi prziprawami niy je take mdłe… jak niy sprōbujecie, to niy bajecie wiedzieć, czy Wōm smakuje 😉

Smacznego 🙂