Słodki niycukrowany syrnik (Sernik fitness)

Myślicie, że niy idzie upiyc syrnika, kery bydzie do maszkycyniŏ1, a niy bydzie mioł cukru ani inkszych2 stewii abo ksylitolu? To jŏ Wōm powia3, że idzie. I na spokojnie mogecie sie potyn zjejś i 3 kōnski4, bo nawet, jak tam sōm wynglowodany, to yno te zdrowe 😉

A ze czego ôn mŏ być słodki? Ze jabek 🙂

Co potrza?

1 kg syra (jŏ żech doł ze wiaderka)

5 jajec

5 wiynkszych, słodkich jabek

sok ze poły citrōłny

3 gorście rodzynkōw (a te Asie, kere ich niy lubiōm, to niech wciepnōm żurawina 😉 )

1 pudding

100 gr masła

Jabka ôbiercie, zetrzyjcie na tarle5, wymiyszejcie ze sokym ze citrōłny i wciepcie6 na patelnia, żeby ś nich ôdparowała woda – mogecie je tyż potyn zblyndować.

Biołka ubijcie na piana. Żōłtka zmiksujcie ze masłym, potyn dejcie ku tymu ochōdzōne7 jabka, syr, pudding. Na sōm kōniec wmiyszejcie tam piana, dejcie rodzynki i przelyjcie do formy- jŏ żech mioł tako sztyrogato8 i bez to niy mōm go za wysokego, ale mogecie tyż sie go upiyc we tortownicy.

Bratruła9 ôzgrzyjcie na 180 stopni, wrojście tam syrnik na 50-60 minut i fertich10.

A potyn już yno kafyj abo tyj11 i smacznego 🙂

1łasuchowanie

2innych

3powiem

4kawałki

5tarce

6wzrzućcie

7ostudzone

8prostokątną

9piekarnik

10gotowe

11herbata

Sam tyż mogecie mie znojś:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*