Słodki niycukrowany syrnik (Sernik fitness)

Myślicie, że niy idzie upiyc syrnika, kery bydzie do maszkycyniŏ¹, a niy bydzie mioł cukru ani inkszych² stewii abo ksylitolu? To jŏ Wōm powia³, że idzie. I na spokojnie mogecie sie potyn zjejś i 3 kōnski⁴, bo nawet, jak tam sōm wynglowodany, to yno te zdrowe 😉

A ze czego ôn mŏ być słodki? Ze jabek 🙂

Co potrza?

1 kg syra (jŏ żech doł ze wiaderka)

5 jajec

5 wiynkszych, słodkich jabek

sok ze poły citrōłny

3 gorście rodzynkōw (a te Asie, kere ich niy lubiōm, to niech wciepnōm żurawina 😉 )

1 pudding

100 gr masła

Jabka ôbiercie, zetrzyjcie na tarle⁵, wymiyszejcie ze sokym ze citrōłny i wciepcie⁶ na patelnia, żeby ś nich ôdparowała woda – mogecie je tyż potyn zblyndować.

Biołka ubijcie na piana. Żōłtka zmiksujcie ze masłym, potyn dejcie ku tymu ochōdzōne⁷ jabka, syr, pudding. Na sōm kōniec wmiyszejcie tam piana, dejcie rodzynki i przelyjcie do formy- jŏ żech mioł tako sztyrogato⁸ i bez to niy mōm go za wysokego, ale mogecie tyż sie go upiyc we tortownicy.

Bratruła⁹ ôzgrzyjcie na 180 stopni, wrojście tam syrnik na 50-60 minut i fertich¹⁰.

A potyn już yno kafyj abo tyj¹¹ i smacznego 🙂