Krōlik bez wynŏkwiania (Królik bez wydziwiania)

Na Wielkanoc wszyndzie¹ połno² krōliczkōw i hazokōw³, to żech sie pomyśloł, że do brytfanki tyż sie jednego wciepna⁴ 😉

Tyn recept⁵ je richtich⁶ ajnfachowy⁷, ale krōlik wylŏz⁸ ś niego idealny… a na deser mogecie sie zjejś takego szokoladowego 😉

Co potrza?

1 krōlik

2 zōmbki czosku

2 łeżeczki mostrichu⁹ (jŏ żech mioł mostrich Dijon)

sōl i pieprz

100 ml biołego wytrawnego wina

łeżka mōnki kartŏflanyj¹⁰

100 ml śmietōnki (nojlepi 30 %)

Dziyń pryndzyj nasmarowołech krōlika wyciśniyntym czoskym i mostrichym, dołech na niego tyż trocha soli i pieprzu. Na drugi dziyń opiyk żech go na patelni i wciep¹¹ do brytfanki. Wlołech tam trocha wody, wino i potyn bez 2-3 godziny sie warzōł na małym ôgniu.

Na kōniec wciep żech go do bratruły¹²– bez zōłzy- na 15 minut na funkcja grill (na średniyj mocy), żeby sie rōwno przibrōnŏciōł¹³.

Do zōłzy¹⁴ wlołech rozfyrlanoł¹⁵ we zimnyj wodzie mōnka, śmiytōnka i jak sie to uwarzōło, to jeszcze żech ta zōłza trocha dosmakowoł¹⁶ solōm i pieprzym. Wyciōng żech miyso ze bratruły i na talyrzu ôblołech je zōłzōm.

Jŏ żech jŏd go ze modrōm kapustōm i klōzkami, ale do takego krōlika to i nudle abo i kartŏfle tyż przipasujōm. Smacznego 🙂