Yno żeby sie sam żŏdyn1 niy myśloł, że po Godach2 sie ze choinki narychtuje taki syrop- tyn je ze modych pyndōw sosny, kere sie zbiyro we maju. Je w nim kans fetaminy C, roztomajtych olejōw eterycznych i je richtich3 dobry przi kucaniu4 i roztomajtych5 chorobach, kere sie na jejsiyń abo bez zima do dōm cisnōm. Dejcie yno pozōr6, kaj7 zbiyrocie te pyndy (nojlepsze to sōm te, kere majōm 5-12 cm), żeby to niy bōło kole drogi i żeby Wŏs we lesie niy chyciōł fejśter8. I niy zrywejcie za jednym razym wszyjskich ze jednyj gałyńzi, bo trza sie tyż dzielić ze strōmym9.
Co potrza?
wiela gramōw pyndōw, tela cukru (moge być i tyn brōnŏtny10)
jak robicie to yno dlo dorosłych, mogecie tam do kŏżdyj krauzki11 dać łeżka szpyrytusu, to sie Wōm na zicher12 to niy zepsuje
Pozbiyrejcie i umyjcie pyndy (mogecie je tyż pokrajać). Przekłodejcie je we krauzie ze cukrym. Odłōżcie to na jake 3 tydnie, przelyjcie bez gaza i wlyjcie do krauzkōw. Dzieciōm mogecie dŏwać tyn syrop ôd 6 lŏt. Dlo majerantnych13 mogecie dać tam tyż łeżka szpyrytusu. Niyftorzi to pasteryzujōm, ale mie by bōło szkoda tych wszyjskich skłŏdnikōw. Trzimejcie syrop we lodōwce! I na zdrowie 😉
1nikt
2Boże Narodzenie
3naprawdę
4kaszlu
5różnych
6uważajcie
7gdzie
8leśniczy
9drzewem
10brązowy
11słoiczka
12na pewno
13dorosłych
