Wiśnia we szokoladzie

Uwielbiōm połōnczynie wiśni i szokolady… choć tak po prŏwdzie¹ to jŏ szokolada lubia nawet ze miysym (sōm take fajne meksykańske recepty na miyso 😉 ).

Te ciasto niy bydzie za słodke, kebyjście chcieli mieć słodsze, to dejcie 1,5 szklōnki cukru.

Idzie pedzieć, że je blank ajnfachowe… prawie murzynek… prawie 😉

Co potrza?

200 g masła

1/2 szklōnki mlyka

100 g szokolady deserowyj abo gorzkyj

2 łeżki kakao

1 szklōnka cukru

2,5 szklōnki mōnki

4 jajca

2 łeżeczki proszku do pieczynioł

trocha soli

500-700 g wiśni

Masło, mlyko, szokolada, kakao i cuker dejcie² do gorka i powarzcie³ na małym ôgniu, aż sie z tego narychtuje jednolity syrop. Ochōdźcie⁴ go i ôdbiercie połra łeżek do jaki szolki⁵ (bydzie do posmarowania po wiyrchu po upieczyniu). Ubijcie biołka (mogecie dać ździebko⁶ soli). Niyskorzi do ochōdzōnyj masy dejcie żōłtka, mōnka, proszek do pieczynioł i dobrze to wymiksujcie. Na kōniec wmiyszejcie do tego ubite biołka (to już mogecie zrobić warzechōm).

Łozgrzyjcie bratruła⁷ na 180 stopni. Masa przelyjcie do formy, połozciepujcie⁸ po wiyrchu wiśnie (bez pestkōw!) i wrojście te ciasto na 45-50 minut do pieca.

Jak baje⁹ upieczōne, to posmarujcie je po wiyrchu jeszcze tym syropym, ochōdźcie i… smacznego 🙂