To je chyba nojbarzi1 ajnfachowy2 do narychtowania3 deser, ale i przi okazji jedyn z nojlepszych maszkytōw4. Do tego receptu mogōm sie przidać wszyjske sezōnowe owoce, a bez zima i take odmrożōne. A na wiyrchu chrupiōncŏ posypka ze masła… jak chcecie to narychtować ze margarinōm, to może i lepi, keby Wōm ta miska sleciała5 na ziymia 😉
A jak już to bydzie upieczōne, kafyj we szolkach6, to idzie i ku tymu dać gałka lodōw… Niy ma bezuchu7, kery by na cojsik takego marudziōł- chyba, że jake pofyrtane8 modelki, kere jedzōm yno liście szałŏtu i ôgōrki 😉
Co potrza?
owoce (u mie bōły śliwki)- tak aby ze pó kilo by ich musiało być, moge być i wiyncyj, wszyjsko zależy tyż ôd tego, jake je te naczycie żaroodporne, we kerym to bydziecie rychtować
Posypka:
1/3 kostki masła
pó szklōnki cukru
wiynksze pó szklōnki mōnki
ździebko9 proszku do pieczyniŏ
pŏra kropli arōmatu waniliowego (nojlepi keby bōł naturalny, a niy wanilinowy)
Tak po prŏwdzie to posypka nojczyńścij robi sie na ôko- jak sie niy bydzie kleić, to dŏcie10 jeszcze masła, a jak bydzie za rzŏdke, to wiyncyj mōnki. Wszyjske skłodniki wciepcie do miski i ugniŏtejcie, na kōńcu musi być takŏ plastycznŏ, jak plastelina.
Na dōł naczynia dejcie owoce, a na wiyrch posypka i to już całŏ filozofijŏ 😉
Nojlepi posypka rozgniyjś trocha miyndzy palcami, żeby sie z ni zrobiōły take małe placki.
Rozgrzyjcie bratruła na 200 stopni i wrojście tam nadzynie żaroodporne (chyba, że robicie to na blasze) na 20-30 minut. Jak posypka bydzie fajnie przibrōnŏcōnŏ11, to już baje12 fertich13. A potyn już yno maszkycynie. Smacznego 🙂
1najbardziej
2prosty, zwykły
3przygotowania
4smakołyków
5spadła
6filiżankach
7gości
8zwariowane
9szczypta
10dacie
11przypieczona
12będzie
13gotowe
