Owoce ze posypkōm (Crumble)

To je chyba nojbarzi¹ ajnfachowy² do narychtowania³ deser, ale i przi okazji jedyn z nojlepszych maszkytōw⁴. Do tego receptu mogōm sie przidać wszyjske sezōnowe owoce, a bez zima i take odmrożōne. A na wiyrchu chrupiōncŏ posypka ze masła… jak chcecie to narychtować ze margarinōm, to może i lepi, keby Wōm ta miska sleciała⁵ na ziymia 😉

A jak już to bydzie upieczōne, kafyj we szolkach⁶, to idzie i ku tymu dać gałka lodōw… Niy ma bezuchu⁷, kery by na cojsik takego marudziōł- chyba, że jake pofyrtane⁸ modelki, kere jedzōm yno liście szałŏtu i ôgōrki 😉

Co potrza?

owoce (u mie bōły śliwki)- tak aby ze pó kilo by ich musiało być, moge być i wiyncyj, wszyjsko zależy tyż ôd tego, jake je te naczycie żaroodporne, we kerym to bydziecie rychtować

Posypka:

1/3 kostki masła

pó szklōnki cukru

wiynksze pó szklōnki mōnki

ździebko⁹ proszku do pieczyniŏ

pŏra kropli arōmatu waniliowego (nojlepi keby bōł naturalny, a niy wanilinowy)

Tak po prŏwdzie to posypka nojczyńścij robi sie na ôko- jak sie niy bydzie kleić, to dŏcie¹⁰ jeszcze masła, a jak bydzie za rzŏdke, to wiyncyj mōnki. Wszyjske skłodniki wciepcie do miski i ugniŏtejcie, na kōńcu musi być takŏ plastycznŏ, jak plastelina.

Na dōł naczynia dejcie owoce, a na wiyrch posypka i to już całŏ filozofijŏ 😉

Nojlepi posypka rozgniyjś trocha miyndzy palcami, żeby sie z ni zrobiōły take małe placki.

Rozgrzyjcie bratruła na 200 stopni i wrojście tam nadzynie żaroodporne (chyba, że robicie to na blasze) na 20-30 minut. Jak posypka bydzie fajnie przibrōnŏcōnŏ¹¹, to już baje¹² fertich¹³. A potyn już yno maszkycynie. Smacznego 🙂