Rolady (Śląskie zrazy wołowe ;) )

Jak ludzie na cołkim świecie sie myślōm ô ślōnskim ôbiedzie, to zarŏzki we gowie majōm rolada wołowo. Za starego piyrwyj to na zicher niy bōło¹ takego mitaku² na kŏżdŏ³ niydziela, ale już przy jakim świyńcie abo i inkszym⁴ fajerze⁵ mōgli sie takŏ rolada lajstnōńć⁶. Narychtowanie⁷ takego miysa⁸ niy je za kans⁹ trudne, ale na zicher¹⁰ trza mieć na to trocha czasu i żeby sam wiyncyj niy pisać, to sie bierymy za robota.

Co potrza?¹¹

5-6 kōnskōw¹² miysa wołowego na rolady (tak żeby te szajby¹³ bōły aby na 1 cm rube¹⁴)
5-6 szajbōw wyndzōnki¹⁵
5-6 łyżeczek mostrichu¹⁶
2-3 kiszōne ôgōrki

skōrka ze chleba (tak ze 2 sznitōw¹⁷)

1 cebula

keliszek czerwōnego wina
50-100 ml śmiytōnki¹⁸
2-3 łeżki¹⁹ masła klarowanego (choć mogecie i bez tego)
trocha²⁰ wody

połra ziorek ziela angelskego

2-3 liście bobkowe

ze dwa suszōne grziby
sōl, pieprz
mōnka²¹ do zagynszczynia zōłzy (moge być pszynnŏ abo kartŏflanŏ)
5-6 metrowych nici- jak mołcie²² lust²³, to sie mogecie wziōńć²⁴ nawet różowe 😉

Rozczaskejcie²⁵ sie te miyso- chyba, że mŏcie takego masŏrza,²⁶ co je rozczaskuje abo moł jakego stikera 😉
Wciepcie²⁷ na kŏżdo²⁸ rolada łeżeczka mostrichu i rozsmarujcie. Posypcie troszka pieprzym i solōm. Podpiyczcie sie szajby boczku na tyglu²⁹ i dejcie³⁰ na rolada. Na kŏżdo rolada dejcie tyż trocha skōrki ze chleba, kōnsek ôgōrka i plaster cebuli. Tera trudne zadanie, bo trza je zwinōnć³¹ tak, żeby ze środka nōm³² nic niy wyleciało. Ôwińcie sie je fajnie niciōm i dejcie je na rozgrzōno patelnia- kaj³³ sie  pryndzyj³⁴ smażōła ta wyndzōnka (jakby co, to mogecie tam wciepnōńć tyż trocha masła klarowanego). Terŏzki trza je podpiyc ze wszyjskich strōn i nojgorsze w tym bańdzie³⁵ to pyrskanie³⁶ tego tustego,³⁷ ale na to chyba niy ma rady, yno je kans³⁸ marasu³⁹ 😉 Podpiykejcie je nojlepi na patelni, bo Wōm sie niy bańdzie te miyso prziklejało do dna, a potyn mogecie sie je przełożyć do jaki brytfanki. Na patelnia nalyjcie trocha wody i niech ôna zebiere⁴⁰ to, co sie prziklejōło do dna i dŏ to tyż naszyj zōłzie fajnŏ farba. We brytfance môcie już rolady, wlyjcie tam wino, woda ze patelni, wciepcie⁴¹ prziprawy, grziby i niech sie to tera pomału warzi⁴²– jak mołcie czas, to moge to tak sie pykać⁴³ ze 2 godziny. Jak już miyso je miynke,⁴⁴ to je wyciōngcie⁴⁵ i połōżcie na talyrzu. Do zołzy dodejcie śmiytōnka (dejcie pozōr, żeby sie niy zetła⁴⁶ i bez to lepi jōm trocha zahartować- włŏć dō ni trocha zōłzy), rozfyrlanŏ⁴⁷ ze zimnōm wodōm mōnka (1 łeżka na poła szolki⁴⁸ wody) i niech to fajnie zawrze⁴⁹.Tera doprołwcie⁵⁰ sie to solōm i pieprzym. Ze roladōw ściōngcie⁵¹ nici, na chwila wciepcie do zołzy i fertich⁵². Nojlepi to baje⁵³ smakować ze klōzkōma, ale keby Wōm sie niy chciało ś nimi⁵⁴ smolić⁵⁵, to dobre bydōm tyż i nudle⁵⁶… smacznego 🙂