Whitie- bioły brat brownie ;)

Kedyjś szło już u Chopa poczytać słowa po łacinie, to terŏzki prziszoł czas i na angelski 😉

Jŏ¹ żech je w tyj drużynie, kero² lubi bioło i ciymno szokolada, choć wiym, że niyftorym³ by nawet bez gardło niy przeszło, że ta jasnŏ to tyż je szokolada 😉

To bōł eksperymynt, ale musza Wōm pedzieć⁴, że bardzo udany… a jak do tego byjście dali tak ślagzana⁵ i świyże maliny abo i jake inksze leko kwaskowate owoce, to bydzie idealnie.

Co potrza?

200 g masła- ale pamiyntejcie, żeby je kupić na prōmocji 😉

200 g biołyj szokolady

4 jajca

100 g cukru

150 g mōnki

pyrszczka⁶ soli

Tych skłŏdnikōw je tak mało, że nawet Słōn Trōmbalski by je zapamiyntoł 😉

Masło i szokolada łozpuśćcie⁷ we kōmpieli wodnyj (miska na gorku ze wrzōncōm wodōm).

Jajca i cuker ubijcie- nojlepi jak mŏcie robota, bo dobrze, żeby to sie 5-8 minut ubijało, a co sie mŏcie⁸ trŏpić⁹ 😉

Jak szokolada ze masłym ochōdnōm¹⁰, to dejcie je do ubitych jajec, a ku tymu przesiōnŏ mōnka i sōl.

Nim bydziecie to jakōm warzechōm miyszać, to sie łozgrzyjcie¹¹ bratruła¹² na 160 stopni.

Wymiyszane ciasto dejcie do tortownicy, a jōm do bratruły na 35-40 minut.

A niyskorzyj¹³ już yno…smacznego 🙂