Jak niy ma pomysłu na ôbiad to czynsto sie ludzie bierōm za nudle- chyba, że niy zmiyrznie1 im sie schabowy ze kartŏflami i surōwkōm 😉 Pomysłōw na zōłzy do nudli je tyla co wōngla we niyryntownych grubach2 😉 I sam mŏcie jedyn ś nich, wartko3 sie go robi, ale dugo niy zapōminŏ tego smaku.
Co potrza?
jedna srogŏ4 pierś ze kury
1 cebula
2 zōmbki czosku (bo jedyn srogi)
250 ml mascarpone
dwie gorści liści szpinatu5 (abo jednyn bojtel szpinatu bejbi 😉 )
łeżka masła klarowanego
łeżka syra ze zielōnōm abo niybieskōm pleśniōm (np. gorgonzoli abo i jakigo krajowego 😉 )
3 łeżki oliwy
sōl i pieprz
Pokrejcie kurczaka i podpiyczcie na suchyj patelni (niy bydzie tak pryskać po całyj kuchni tym fetym6). Niyskorzyj dejcie ku tymu masło, oliwa, pokrōnŏ cebula, trocha soli, pieprzu i wyciśniynty czosnek. Jak sie zeszkli cebula, to mogecie to wciepnōńć do wiynkszego gorka (lepi sie bydzie miyszać) i dociepnōńć tam szpinat, mascarpone i syr. Jak sie szpinat leko zblanszuje, to już mogecie wciepować na talyrz nudle (jak je uwarzić, to mŏcie napisane na tytce7 😉 ), ôblywać je naszōm zōłzōm i brać sie za jedzynie. Smacznego 🙂
1znudzi
2kopalniach
3szybko
4duża
5szpinaku
6tłuszczem
7opakowaniu
Dodaj komentarz