Uwielbiōm żeberka… a jak ône sie tak jeszcze pryndzyj poduszōm we gorku ze jakim fajnym dodatkym i niyskorzyj zapiekymy je ze leko słodkōm glazurōm, to bydōm sie nōm same cisnōńć1 do gymby 😉
Co potrza?
2 kg żeberek- tak, aby na dwa obiady stykło 😉
1 piwo- mogecie sprōbować wersja ze jasnym i ciymnym piwym
pŏra2 ziorek ziela angelskego
pŏra ziorek owocōw jałowca
trocha kminku
pŏra liści bobkowych3
sōl i pieprz
łeżka kechupu
łeżka miodu
łeżka dżymu ze moreli- choć jŏ żech sam mioł a’ la dżym, kery mi łostoł po rychtowaniu nŏlywki ze moreli 😉
Pokrejcie żeberka na mańsze kōnski4, wciepcie do gorka, wlyjcie piwo, dolyjcie wody (żeby miyso bōło przikryte), wciepcie5 prziprawy i niech sie to podusi na małym ôgniu tak aby ze dwie godziny.
Włōnczcie bratruła6 na 200 stopni, wyciōngcie miyso i wymiyszjecie we jaki misce kechup, miōd i dżym (glazura). Niyskorzyj poukłŏdejcie na blasze żeberka, posmarujcie glazurōm i wrojście to wszyjsko do nagrzōnyj bratruły na 30 minut. A potyn już yno smacznego 🙂
PS Ze wywaru mogecie sie na drugi dziyń narychtować7 zupa abo dejcie go do krauzy i łostŏwcie to na jaki inkszy dziyń 🙂
1pchać
2kilka
3laurowych
4kawałki
5wrzućcie
6piekarnik
7przygotować
