Torta choby ze Szwarcwaldu (Tort a’la szwarcwaldzki)


Warning: Undefined array key "sfsi_plus_mastodonIcon_order" in /home/klient.dhosting.pl/chopwkuchni/chopwkuchni.pl/wp-content/plugins/ultimate-social-media-plus/libs/sfsi_widget.php on line 1748

1 nojbarzi lubia take torty, kere2 niy sōm ani za słodke, ani za tuste. Ta torta ze wiśniami je3 idealnŏ- intynsywny smak szokolady łōnczy sie ze słodyczōm i kwajśnymi wiśniami. Niy ma sam nic trudnego do narychtowania, bez to niy ma co sie łozpisywać i trza sie brać do roboty.

Co potrza?

Szokoladowy biszkopt:

6 srogich4 jajec

125 cukru

100 g mōnki

40 g kakao

mogecie tyż dać poła5 łeżeczki proszku do pieczynia, ale jak tyn biszkopt bydzie dobrze ubity, to proszek niy bydzie potrzebny

Kryjmy:

600-800 ml śmietōnki 36 %

2 abo 3 usztywniacze do śmietōnki

3 abo 4 łeżki cukru (jak dŏcie 800 ml śmietōnki, to lepi dać trocha wiyncyj cukru)

250 mascarpōne

1 szokolada deserowŏ

1 bojtel6 mrożōnych wiśni abo 500 g świyżych, wydrylowanych

2 keliszki nŏlywki ze wiśni

Biszkopt nojlepi narychtować dziyń pryndzyj7. Na poczōntek ubijcie jajca ze cukrym- nojprzōd pŏra minut na średnich obrotach, a potyn 8-10 minut na tych nojwiynkszych (nojlepi, jak mŏcie robota kuchynnego i niy bydziecie musieli stŏć i trzimać miksera). Włōnczcie bratruła8 na 175 stopni. Niyskorzyj9 wmiyszejcie do jajec przesiōnŏ mōnka i kakao- pomału, żeby nōm to niy siadło. Przełōżcie biszkopt do tortownicy i dejcie do bratruły na 30 minut.

Na drugi dziyń przekrejcie go na 3 placki i pokropcie je nŏlywkōm.

Ubijcie śmiytōnka. Pod kōniec dejcie tam cuker i usztywniacz. Łozpuśćcie szokolada we kōmpieli wodnyj (miska na gorku ze wrzōncōm wodōm).

Na spodek przidzie biszkopt, na niego dejcie poła śmiytōnki (mogecie tyż trocha odłożyć do szpricy do strojynia po wiyrchu). Jŏ żech sam używoł tyż folii cukierniczyj rantowyj10– fajnie bydōm sie nōm robić warstwy. Na śmiytōnka powciepujcie poła wiśni (pamiyntejcie, żeby pŏra łostawić na wiyrch).

Terŏzki przidzie drugi placek biszkoptu i na niego mascarpōne wymiksowane ze łozpuszczōnōm szokoladōm. Na ta masa zajś powciepujcie wiśnie.

Na sama gōra przidzie ôstatni kōnsek biszkotu i na niego zajś śmiytōnka.

Terŏzki mogecie jeszcze postroić wiyrch szokoladōm, śmiytōnkōm ze szpricy i wiśniōma. Na kōniec ôdwińcie folia, dejcie ta torta na chwila do chōdnego11 i mogecie stawiać na kafyj12.

Smacznego 🙂

1ja

2które

3jest

4dużych

5połowę

6worek

7wcześniej

8piekarnik

9później

10folia cukiernicza (rantowa)

11chłodnego

12kawę

Please follow and like us:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*