Kura ze miyntōm (Drobiowe roladki z jabłkiem i miętą)

Cojsik mie korciōło, żeby zajś¹ poeksperymyntować. Miołech we doniczce miynta, a na parapecie walały sie jakejś jabka, to żech sie pomyśloł, że trza by z tego cojś narychtować.² Dołwno³ żech niy robioł roladōw i trza bōło⁴ poćwiczyć owijanie ich niciōm, a że jabka dobrze smakujōm ze drobiym, tak żech prziszoł na ta kura. Tera yno jeszcze trocha ostrzyjszego smaku- to nōm załatwi zeler⁵ naciowy- i danie mōmy⁶ prawie fertich. Niby proste, ale na talyrzu wyglōndo elegancko i idzie poszpanować, jak dostaniecie jaki bezuch⁷. A jeszcze jak powiycie, żejście to dusiyli we cydrze, to musicie uwarzać, żeby im ze wrażynia gybis⁸ niy wylecioł 😉

Co potrza?

2 piersi z kurczaka abo połra filetōw ze udzika

1 jabko

2 łodygi zelera naciowego

połra gałōnzkōw miynty

zōłza⁹ sojowo

szklōnka¹⁰ cydru ze jabkōw

pieprz

masło klarowane

mało śmietōnka (12 abo 18%)

trocha mōnki

Miyso pokrejcie na wiynksze kōnski i rozczaskejcie¹¹– filety z udzika trza yno rozczaskać. Posmarujcie je zōłzōm sojowōm i posypejcie¹² pieprzym. Do środka kołżdyj rolady wciepcie pokrōne i wymiyszane jabko, zeler i miynta. Tera sie narychtujcie metrowe kōnski¹³ nici. Zawijejcie miyso tak, żeby ze środka nic nōm niy wyleciało, a potyn obwiōnzejcie to fajnie niciōm. Rozgrzyjcie sie patelnia ze masłym klarowanym (2-3 łeżki) i przibrōnołćcie¹⁴ ze wszyskich strōn. Tera nalyjcie tam tego cydru i niech sie to tak ze pó¹⁵ godziny pomału dusi. Potyn wyciōngcie miyso i do wywaru dajcie śmiytōnka- uważejcie, żeby niy bōła za zimno abo mogecie tyż nalołć¹⁶ do ni¹⁷ połra łeżek wywaru, to sie Wōm na pewno ta śmiytōnka niy zwarzi. Idzie¹⁸ tyż trocha zagyńścić ta nasza zōłza mōnkōm- nojlepi jōm pryndzy¹⁹ rozfyrlać²⁰ ze zimnōm wodōm. Dosmakujcie jōm jeszcze solōm i pieprzym, a ze miysa ściōngcie sie tera te nici. Jak już zōłza bydzie fertich, to wciepcie tam jeszcze na chwila miyso, żeby sie podgrzoło i mogecie sie brać za jedzynie.