Panczkraut abo ciapkapusta (Śląskie danie regionalne na bazie ziemniaków i kapusty)

Panczkraut je do ślōnski¹ kuchni jak Mōna Liza do Luwru- jak żejście go niy jedli, to psińco² ô³ ni⁴ wiycie. Piyrwy⁵ niy bōło ślōnski rodziny, co by go aby rołz⁶ za tydziyń niy miała na stole. U moji⁷ Mutry⁸ w dōma bōł⁹ pōnojś¹⁰ w kołżdo¹¹ sobota. Nojlepszym kamratym¹² panczkrautu sōm karminadle, choć joł żech sie go zjołd¹³ ze pieczōnym wōsztym¹⁴ i tyż bōło dobre. I jak kołżdo reprodukcja Mōna Lizy wyglōndo trocha inaczyj, tak niy ma jednego receptu¹⁵ na panczkraut. Kołżdo gospodyni abo kuchołrz mo swōj i bez to mogecie¹⁶ sie szczelić połra¹⁷ roztomajtych¹⁸ wersji tyj ciapkapusty.

Co potrza?

kartołfle¹⁹– moge ich być tyla samo co kapusty, ale pamiyntejcie, że przi takim panczkraucie to sie wszysko warzi na ôko 😉

kapusta- joł żech go robiōł ze kiszōnōm, ale idzie zrobić tyż ze świyżōm (stare kuchary dołwajōm dō ni trocha octu, żeby bōła fajnie kwaskowato)

I tera, jak idzie ô dodatki, to tyż mołcie połra wersji:

1. wyndzōnka²⁰
2. wyndzōnka ze cebulōm
3. ajnbryna²¹– fet²², mōnka²³ i trocha wody

Kartołfle i kapusta uwarzcie we ôsobnych gorkach. Jak już kartołfle bydōm miynke, to ôdcedźcie je i posztamfujcie²⁴. Wciepcie do tego ôdcedzōno kapusta i przismażōno wyndzonka abo wyndzonka przismażōno ze cebulom i wymiyszejcie. Dosmakujcie²⁵ solōm i pieprzym… i fertich²⁶.

Kebyjście chcieli sie zrobić ta ajnbryna, to na patelnia wciepcie trocha fetu, mōnki i leko jōm zbrōnołćcie²⁷, gichnijcie²⁸ do tego trocha wody i wciepcie do kartołfli i kapusty. Jak byście niy mieli fetu, to mogecie jōm tyż zrobić na maśle klarowanym- taki panczkraut bydzie idealny we piōntek do pieczōnyj ryby. Smacznego 🙂