Szałołt eksperymyntalny (Sałatka eksperymentalna)




 

[1]  Bez[2] to eksperymyntalny, bo dołech tam wyrzywo, ftore żech kupiōł piyrszy rołz w życiu- fenkuł. Inkszo nazwa tego to koper włoski i joł niyby wiedzioł, co to jest koper i kaj leżōm Włochy, ale tego żech nigdy niy jołd[3]. Jakby fto niy wiedzioł, jak łon wyglōndo, to pod tym tekstym bydzie łod niego zdjyńcie (po lewyj strōnie). Smakuje jak anyżek i do takich słodkich sałatkōw je bardzo dobry.

Co potrza?

 

2 jabka

puszka kukurydzy

1 fenkuł

1 boryj[4]

5-6 łodygōw zelera naciowego

 

Tyn zeler to jest super sprawa: fajnie chrupie, dobrze smakuje i do tego moł bardzo mało kaloriōw. Kilo tyj zielyniny moł ich tela, co połra kostek szokolady, wiync jakbyjscie sie tak chcieli odchudzać, to sie mogecie na niego przeciepnōńć. Na dole po prawyj bydzie łod niego zdjyńcie, żeby po tym niy bōło jak z mojōm Bratowōm, co to sie dziwiōła, skąd mōm taki rabarbar. Jeronie, zajś żech sie rozpisoł…

 

Zōłza- żeby tyn szałołt niy boł taki za suchy

 

2 łeżki jogurtu greckego

1 łeżka[5] majōnezu

[6] wyciśniyntyj citrōłny[7]

trocha pieprzu (dołwni korzyni)

 

 

Z robiyniym takego szałołtu to niy ma wcale taki srogi[8] filozofii. Myjecie wszysko i krajecie na małe kōnski- yno sie tam tak niy bołwcie z tym krajaniym, żeby Wołs wieczōr niy chyciōł[9]. Mołcie zymby, to i te wiynksze kōncki bajecie umieli pogryjś. No chyba, że mołcie gybis[10], to niy ma wyjścia i trza stołć przi ty desce i krajać.

Jak już wszysko baje w misce, to pomiyszejcie sie ta zōłza, wlyjcie rajn[11] i fertich.

Jak lubicie wiyncyj zołzy, to sie zrobcie jōm i ze 6 łeżek jogurtu. A jak sie bojicie o za srogi brzuch, to mogecie sie jōm zrobić bez majōnezu.

Taki szałołt to idzie zjejś i do grillowanego wōsztu, i do pieczōnego kurczaka, a nawet i zjejś bez niczego. Smacznego!

 

Szałołt eksperymentalny

[1] sałatka

[2] przez to

[3] jadł

[4] por

[5] łyżka

[6] pół

[7] wyciśniętej cytryny

[8] dużej

[9] złapał

[10] sztuczna szczęka

[11] do środka

Fenkuł małe                              Zeler naciowy małe




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*