Dorsz we kokosie (Z bananowym sosem ;) )

Na poczōntku chciołech wszyskim tym, co niy lubiōm wiórkōw kokosowych (kōłkōsraszpli), pedzieć, żeby sie niy nerwowali, bo w tym daniu ich niy znojdōm. Te ciasto, we wtorym je tōnkanoł ryba, zrobiōłech ze mlyka kokosowego, a to je całkym inkszo inkszość1. A wiym, co gołdōm, bo moja Baba niy lubi kōłkōsraszpli i inkszych rafaelo-podobnych rzeczy, ale za to dania ze mlykym kokosowym jy ze smakym, a nawet to, co je driny2 we kokosie, choć jak dō mie to je prawie to samo, jak te suche wiórki. Co by szło na to pedzieć: kobiyty… 😉

Co potrza?

0,5 filetu ze dorsza

trocha mōnki pszynnyj

puszka mlyka kokosowego

ze 3 łeżki mōnki kukurydzianyj (abo, jak niy mołcie, to moge być i pszynno)

1 jajco

1 łeżeczka garam masala

ździebko chili

łolyj3 do pieczynia

Zōłza:

2 banany

połra łeżek jogurtu greckego

połra gołōnzkōw kolyndry

zaft ze jednyj citrōłny

Na poczōntek sie zrōbcie ta zōłza. Wszystke składniki wciepcie do blyndera abo zmiksujcie tōm kōńcówkōm do blyndowania we jaki misce i fertich4. I zarozki5 tyż moge pedzieć, że nasza kōmratka, co to tyż jadła, niy lubi kolyndry, a zōłza ji6 smakowała i nawet sie ździwioła, że je tam ta kolyndra driny.

Ryba moł być i bez ości, i bez skōry. Jak już jōm łobierecie- te kupne filety to nojlepi jeszcze sprołwdzić, żeby sie potyn jaki bezuch7 niy udołwiōł8 łościōm- to pokrejcie jōm na mańsze kōnski (np.: 5 cm na 2 cm). Do jaki miski wbijcie jajco, dejcie mlyko kokosowe, mōnka kukurydzianoł (napisołech 3 łeżki, ale jakby te ciasto bōło za rzołdke9, to dociepcie10 ji trocha wiyncyj), prziprawy i wymiksujcie.

Jak zrobić sie garam masala, znojdziecie sam: http://chopwkuchni.pl/?p=315 .

Rozgrzyjcie sie w jakim gorku łolyj- chyba, że mołcie frytkownica. Wysujcie11 sie na jaki talyrzik trocha mōnki pszynny, łobtoczcie w ni kołżdy kōnsek ryby, potyn tōnknijcie we cieście i do łoleju. Jak sie fajnie przibrōnołci12, to je fertich13 i idzie jeszcze ta ryba yno oblołć zōłzōm i wmōcić14 😉

Smacznego 🙂

Dorsz we kokosie-małe

1coś zupełnie innego

2w środku

3olej

4gotowe

5zaraz

6jej

7goście

8udławić

9rzadkie

10dorzućcie

11wysypcie

12przyrumieni

13gotowe

14zjeść 😉

Sam tyż mogecie mie znojś:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*