Co potrza?
polyndwiczki ze świni- wiela zjycie, tela zrōbcie
citrōłna[1]
połra [2]gałōnzek rozmarynu
pieprz i sōl
bojtlik[3] szpinatu[4]– niech Wos ale Pōn Bōczek brōni, żeby wciepnōńć taki mrożōny
3 zōmbki czosku
oliwa- 3 łeżki
trocha parmezanu
Zetrzijcie skōrka ze tyj citrōłny i łostołwcie na potyn. Te miyso[5] umyjcie, łosuszcie piepiyrowym rancznikym, pokrejcie na mańsze kōnski i dejcie sie je do jaki miski. Wyciście do tego pó[6] citrōłny, wciepcie pokrōny rozmaryn (same listki, a te gałyńzie wyczajście[7]) i dejcie trocha pieprzu. Soli niy dołwejcie, mogecie sie te miyso doprawić na kōńcu. I tak łodstōłwcie[8] to na połra godzi, a nojlepi na całoł noc.
Te miyso to nojlepi ugrilować. I jak sie łōne baje piyc, to szybko zrōbcie tyn szpinat. Do garca wlyjcie oliwa, wyciście czosnek, wciepcie ta otartoł skōrka i niech sie to chwila podsmażi- ale niy za dugo. Wciepcie tam szpinat, wyciście drugoł połowa tyj citrōłny, dejcie soli i pieprzu. Teraz to łon potrzebuje już yno sie leko zblanszować, jak bajecie widzieć, że te listki już tak jakby prziklapły, to znaczy, że już je fertich[9]. Na talyrzu dajcie na tyn szpinat trocha parmezanu- nojlepi takego co to sami mogecie go zetrzyć.
Całoł robota zajmie Wōn nojwyżi piytnołście minut. A zjeś się to mogecie z bōłkōm albo tyż z nudlami- jak bydziecie jejś z nudlami, to mogecie wciepnōnć na nie trocha masła.
Smacznego 🙂
[1] cytryna
[2] parę
[3] woreczek, opakowanie
[4] szpinak
[5] mięso
[6] połowę
[7] wyrzućcie
[8] odstawcie
[9] gotowe
Dodaj komentarz