Kura we rieslingu (Coq au riesling ;) )

Jak już po mianie1 widać, ftojś2 te jołdło3 wynołkwiōł4 we Francji, a dokładnij we Alzacji, co to leży przi samyj granicy ze Niymcami. Wina riesling to chyba żołdnymu5 przedstawiać niy musza, bo to przeca nawet nasze ōłpy6 już za starego piyrwy7 piyli niymiecke rieslingi. We Alzacji tyż majōm podobne zorty8 wina, ale te danie moł kans9 wpōlnego ze inkszymi10 daniami francuskimi, kaj11 tyż sie leje do garca dojś12 wina. We Burgundii majōm coq au vin- co by szło przetłumaczyć na ôżarto13 kura- ale tam we gorku pływoł czerwōne wino, bo to przeca14 je regiōn, kery15 sie asi16 właśnie takim winym. Do tego drugigo receptu17 jeszcze kedy przidymy, a tera sie bierymy za nasza kura we rieslingu.

Co potrza?

1 kg kurczaka- nojlepi filet ze podudzi abo piersi

15-20 dkg wyndzōnki18

połra łeżek mōnki19

ze 2 łeżki masła klarowanego

2 łeżki masła

2 łeżki oliwy

3 szalotki abo jake inksze cebule

25 dkg pieczarkōw

2-3 łeżki kōniaku abo brandy

0,5 litra wina riesling (nojlepi wytrawnego- jakby co, moge być tyż półwytrawne)

20-25 ml śmietōnki (moge być krymōwka abo i jako chudszoł)

3-4 liście bobkowe20

sōl i pieprz

natka ze pietruszki

Na sōm poczōntek pokrejcie21 wyndzōnka we kostka i podpiyczcie na patelni. We wiynkszym gorku, we ftorym bydymy potyn to wszyjsko rychtować22, mogecie zeszklić na maśle (tym normalnym) i oliwie pokrōnoł cebula. Jak już nōm sie ta wyndzōnka fajnie podpieke, to tyż jōm tam wciepcie23. Tyn gornek mogecie symnōńć24 ze ôgnia, co by nōm sie cebula niy przipołlōła25. Niyskorzi26 sie bierymy za pieczarki- pokrejcie je we plasterki, podpiyczcie na patelni ze masłym klarowanym i przeciepcie27 do garca. Tera ôstoł28 nōm już yno kurczak (jak mołcie29 filety ze podudzi, to nawet ich niy trza krajać na mańsze kōnski30, a filet ze piersi mogecie pokrajać na szyroke31 paski). Niyskorzi pokulejcie32 go trocha we mōnce i wciepcie na patelnia- dajcie na nia yno ździebko33 masła klarowanego, to wtedy niy bydzie tak pyrskać34. Jak już sie kurczak przipieke35, to tyż go wczajście36 do gorka. Potyn wlyjcie37 kōniak do jaki kelni38 abo gorczka, podgrzyjcie i (UWAGA!) podpołlcie39. Jak sie baje40 połlić, to gichnijcie41 tym to wszyjsko, co mocie we gorku. Jak sie wypołli (tyn sznaps42, a niy Wasza kuchnia 😉 ) to wlyjcie do gorka wino, wciepcie prziprawy i niech sie to tak na małym ôgniu bez pó godziny popykoł43. Niyskorzi wyciōngcie miyso na jaki talyrz i dejcie44 do gorka śmiytana- trza by jōm pryndzyj trocha zahartować, a to znaczy wlołć do ni trocha zōłzy45 i wymiyszać. Mogecie tyż potyn trocha zagyńścić nasza zōłza mōnkōm (rozfyrlejcie46 jōm we zimnyj wodzi i gichnijcie do gorka). Jak już bydzie fajnie gynstoł47– sōm take kuchołrze, co by to zagynszczali yno bez ôdparowanie wody, ale jôł je chyba na to za zgniōły48 😉 – to ôstało nōm już yno dosmakowanie, pokrajanie pietruszki na wiyrch49 i mogymy sie brać za futrowanie50. Takoł kura mogecie zjejś ze bagetkōm, klōskōma, nudlami51 abo jako tam chcecie. Mie już ôstało yno napisać: smacznego 🙂

1nazwie

2ktoś

3danie

4wymyślił, ō- samogłoska w wymowie pomiędzy o i u

5nikomu

6dziadkowie

7dawniej

8odmiany

9dużo

10innymi

11gdzie

12dużo

13pijaną; ô= ło

14przecież

15który

16chwali, szczyci

17przepisu

18boczku wędzonego

19mąki

20laurowe

21pokrójcie

22przygotowywać

23wrzućcie

24zdjąć

25przypaliła

26później

27przerzućcie

28został

29macie

30mniejsze kawałki

31szerokie

32obtoczcie

33troszeczkę

34pryskać

35przypiecze

36wrzućcie

37wlejcie

38chochli

39podpalcie

40będzie

41oblejcie

42alkohol

43pobulgocze

44dajcie

45sosu

46rozmieszać

47gęsta

48leniwy

49górę

50jedzenie

51makaronem

Sam tyż mogecie mie znojś:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*