Kreple (Pączki)

Tych nadziywanych krepli to żech jeszcze niy robiōł¹ (abo jak żech robiōł za bajtla, to już niy pamiyntōm), a że joł lubia eksperymynty, to żech sie za nie wziōn. Jak już czowiek robi kreple, to wiadōmo, że bydzie ich kans², to tyż trza zawołać kogojś do pomocy przi jedzyniu. Chciołech zrobić je yno ze pó kila³ mōnki, ale moje kōmratki⁴ padały⁵: Chopie, to sie niy opłaci, rōb ze całego kila mōnki, przeca to zjymy… suchej⁶ czowieku babōw, to bajesz⁷ mioł wiyncyj roboty 😉 Moje gojście muszōm sie ale tyż niyrołz chycić za robota, a że take dwie mi kans pomołgały, to muszą je sam spōmnieć- a nojbarzi ta jedna, kero⁸ prziniysła z dōma kōnfitura ze róży, kero robiōła ôd⁹ ni ōłma¹⁰… tyn samk bōł niy do opedzynia¹¹. Kreple wyszły richtich¹² dobre i namołwiōm Wołs, cobyjście sie tyż zaprojsili swoich kamratōw na klachy¹³ przi robiyniu krepli.

Co potrza?

0,5 kg mōnki¹⁴

6 żōłtek

2 biōłka (te reszta biōłek mogecie sie zamrojzić¹⁵)

5-6 dkg drożdzy

pó abo 3/4 szklōnki mlyka

pó szkōnki cukru

pó łeżeczki soli

15 dkg ôzpuszczōnego¹⁶ masła

pó keliszka szpyrytusu¹⁷ abo jakego sznapsa¹⁸

ôlyj do pieczynia

pudecuker¹⁹ do posypania po wiyrchu²⁰

Rajn²¹ mogecie wrojzć, co Wōm sie podobo: szokolada²², kōnfitura, marmolada abo co tam mołcie²³.

Przesiōnoł²⁴ mōnka dejcie²⁵ do miski, na pośrodku²⁶ zrōbcie dziura i tam wlyjcie²⁷ ôzpuszczōne we letnim mlyku drożdze i 2 łeżki cukru. Tera trza²⁸ poczekać, co by te drożdże zaczły robić, a jak już tego zaczynu bydzie²⁹ rołz tela³⁰, to mogecie sie zajś³¹ brać za robota. Wciepcie tam żōłtka, reszta cukru, ôzpuszczōne masło, szpyrytus i fajnie to rozrōbcie³². Pod kōniec mogecie dociepnōńć³³ ubite biōłka. Jak już wszyjsko baje³⁴ fajnie wymiyszane, to ôdstołwcie to zajś we jake ciepłe miejsce (joł ôzgrzywōm bratruła³⁵ na 50 stopni, wyłōnczōm i tam to ôstawiam³⁶ do wyrojśniyńcia). Jak już tego zajś baje rołz tela, to wyciepcie to na stolnica (biyrkownica), posujcie³⁷ mōnkōm i zrōbcie z tego wałek. Niyskorzi sie wejście nōż i pokrajejcie to na ciyńke szajbki³⁸(1cm). Wejście sie potyn takoł szajbka, do środka wrojście kōnsek szokolady abo marmolady, zaklyjcie i zrōbcie z tego takego fajnego krepla. Jak już wszyske bydōm ze nadziyniym, to zajś trza je ôstawić na chwila do wyrojśniyńcia, a jak już sie trocha dźwignōm³⁹, to sie bierymy⁴⁰ za pieczynie. We gorku rozgrzyjcie sie ôlyj (no chyba, że chcecie je piyc na fecie⁴¹) i jak już bydzie fest⁴² ciepły, to wciepcie tam połra krepli, dojś szybko trza je bydzie ôbrōcić na drugoł zajta⁴³ i jak już bydōm fajnie upieczōne, to wyciōngcie je na papiyrowy ryncznik, co by tyn fet⁴⁴ trocha tam wsiōnknōł, potyn posujcie leko pudecukrym i… reszty chyba już Wōm niy musza tłumaczyć 😉 Smacznego 🙂