Karbinadle (Kotlety mielone z niespodzianką)

Kajś¹ żech przeczytoł, że za starego piyrwy² robiyli karminadle³ ze miysa i śledzia- możno bez to, że ślydź bōł⁴ tōńszy⁵ ôd⁶ miysa, a gymbōw do wyżywiynia bōło kans⁷. Tak żech sie pomyśloł: jako to moge smakować… i trza bōło sie to aby rołz narychtować⁸. Take karminadle ze śledziym nazywajōm sie pōnojś karbinadle. Smakujōm dojś⁹ specyficznie i jak fto niy lubi śledzi, to niech sie nawet za nie niy chyto¹⁰. To taki kōnsek¹¹ historyji na talyrzu.

Co potrza?

0,5 kg mielōnego miysa- moge być wieprzowo-wołowe abo same wieprzowe

1 płat słōnego śledzia

trocha mlyka do zamoczynia śledzia

jajco

cebula

czosnek

staro żymła¹² (zamoczōno we wodzie abo mlyku), a jak niy mołcie żymły, to dejcie¹³ 3 łeżki¹⁴ tartyj bōłki

sōl i pieprz

łeżeczka majeranku

trocha pokrōnyj natki pietruszki

łeżeczka mostrichu¹⁵

tarto bōłka do obtoczynia klopsōw

olyj¹⁶ do smażynio

Śledzia zamoczcie we mlyku- aby¹⁷ na godzina. Potyn go zmielcie ze miysym- abo, jak już miyso mołcie pomelane¹⁸ u masołrza¹⁹, mogecie go zblyndować. Miyso, śledzia, pokrōno cebula, wyciśniynty czosnek, wyciśniynto ze wody żymła, jajco i prziprawy wciepcie do jaki miski i wymiyszejcie. Potyn²⁰ ukulejcie sie take spłaszczōne kulki, ôbturlejcie w tartyj bōłce i wciepcie na rozgrzōno patelnia. Upiyczcie²¹ na złoty kolor i fertich²². Smacznego:)