Kryjma citrōłnowo (Lemon curd- jakby to tak po polsku powiedzieć ;) )

Ta angelsko kryjma¹ je tak dobro, że jak rołz² jōm zrobicie i zjycie³, to zarozki⁴ bydziecie myśleć, kedy by jōm zajś narychtować⁵. Robi sie jōm dojś⁶ szybko, a potyn idzie jōm trzimać we lodōwce⁷ nawet do dwōch tydni, choć wōntpia⁸, żeby we ftoryj chałpie⁹ aż tyla udało ji sie wytrzimać. Idzie sie tōm kryjmōm posmarować sznita¹⁰, przełożyć niōm ciasto, nafilować¹¹ tarletki abo windbojtle¹², połōnczyć jōm ze śmiytōnkōm abo mascarpone i mieć delikatny kryjm do torty, abo jōm zezryć¹³ łeżeczkōm, jak żołdyn¹⁴ ze dōmownikōw niy patrzi 😉

Co potrza?

3 citrōłny¹⁵

0,5 szklōnki cukru

80 g masła

3 jajca

We jaki misce abo gorku nad wrzōntkym ôzpuście¹⁶ masło, dodejcie tam starto skōra ze citrōłnōw (bez biołego), sok i cuker. Jak sie to wszyjsko fajnie wymiyszo, to wciepcie tam żōłtko i ubite biołka i tak dugo miyszejcie (mikserym,trzepaczkōm abo warzechōm), aż fajnie Wōm zgynstnieje – połra minut na to zleci.

Potyn przełōżcie do jaki krauzy¹⁷ abo inkszego pojymnika, wrojście¹⁸ do lodōwki i… za chwila sie zacznie.

Smaczego 🙂