Chlyb pszynny z gorka

Jak żech tyn chlyb wyciōng¹ ze bratruły² i żech go powōnioł³, to już chciołech w niego wbić zymbska⁴. Tyn smak przipōmni Wōm nojlepsze chleby z czasōw, jak żejście byli bajtlami⁵, a ta chrōpiōnco skōrka… marzynie. Yno trocha masła i nic wiyncyj niy trzy… chyba, że dobry fet⁶ 😉

Co potrza?

750 g mōnki pszynnyj (zorta⁷ 750)

10 g soli (2 łeżeczki)

25 g drożdży

2 łeżeczki cukru

2 łeżki masła (50 g)

0,5 litra ciepłyj wody

Wlyjcie do miski woda i łozpuśćcie⁸ w ni drożdże. Potyn dejcie do tego łozpuszczōne masło, cuker, sōl i wymiyszejcie. Na sōm kōniec wciepcie tam mōnka, wyrōbcie to trocha, przikryjcie foliōm i wrojście na noc do lodōwki- sie ździwicie, jak to tam baje⁹ rosło 😉

Na drugi dziyń wysujcie¹⁰ na blat trocha mōnki, przeciepcie na nia ciasto i bez połra minut je wyrobiejcie. Potyn na dōł miski wsujcie trocha mōnki, ze ciasta zrōbcie kulka i wrojście jōm do tyj miski- po wiyrchu tyż mogecie to posuć¹¹ trocha mōnkōm. Odstołwcie to na 90-120 minut w jake ciepłe miejsce. Joł łozgrzywōm na chwila bratruła, wyłōnczōm i wrołżōm¹² tam ta miska.

 

Jak już wyrojśnie, to do bratruły wrojście naczynie żaroodporne abo brytfanka, we keryj bydziecie piyc tyn chlyb i łozgrzyjcie piec do 220 stopni. Wyciōngcie naczynie, wciepcie dō niego chlyb, przikryjcie i wrojście do pieca. Bez 10 minut niech sie to piecze na 220, potyn 20 minut na 200 stopni. Jak już minie tyn czas, to ściōngcie pokrywka ze tego naczynia abo brytfanki i niech sie to jeszcze tak popiecze bez 20-30 minut. Musicie wachować¹³, jak wyglōndo skōrka- keby bōła za jasnoł, to bydzie potrzebowoł tyn chlyb niy 20, a 30 minut. 

Jak już bydzie fajnie przibrōnołcōny¹⁴, to wyciōngcie go ze bratruły i brytfanki i niech sie fajnie ochōdzi na jaki kratce. A potyn to już yno… smacznego 🙂

 

 

 

1wyjąłem