Abgeryjta ze baniōm (Babka dyniowa)

Eksperymynty ze roztomajtymi abgeryjtami ze baniōm¹ robiōłech bez połra dni, wyszło z tego jedne ciasto bezglutynowe, druge… trocha mani² udane, ale za to te trzecie, ô³ ftorym sam byda pisoł, to je richtich⁴ cojsik do pomaszkycynia⁵. Moja Ōłma⁶ za starego piyrwy⁷ robiōła ze bani kōmpot (za bajtla⁸ mie ôn tak za kans⁹ niy smakowoł), dołwała¹⁰ tam tyż gojździkōw¹¹ i joł chcioł jakosik tym receptym prziwołać te stare smaki. Niyftorzi pedzōm¹², że abgeryjta (abo zista) to je yno take blank¹³ ajnfachowe¹⁴ ciasto bez żołdnych inkszych¹⁵ dodatkōw, ale ci, co już sam połra¹⁶ receptōw¹⁷ czytali, wiedzōm, że Chopowi w kuchni niyrołz¹⁸ sie miyrznie¹⁹ i potyn wynołkwio²⁰ 😉

Co potrza?

25 dkg potartyj- na małych ôczkach- bani (jakbyjście dali bania hokkaido, to nawet niy musicie ji nojprzōd ôbiyrać)

skōrka ôbtarto ze 2 citrōłnōw²¹

4 jajca

0,5 kostki masła (100 g- no chyba, że ftojś to baje²² robiōł we Niymcach, to moge dać mańsze pó²³; ôni tam majōm wszysko²⁴ wiynksze… nawet masło: 250 g 😉 )

zaft²⁵ ze poły citrōłny

pó łeżeczki zmielōnych gojździkōw

2 szklōnki mōnki pszynny

1 łeżeczka proszku do pieczynia

1 łeżeczka sody ôczyszczōnyj

3/4 szklōnki cukru

0,5 szklōnki ôleju

Na wiyrch²⁶:

zaft ze poły citrōłny

pudecuker

Nojprzōd²⁷ rozgrzyjcie sie bratruła²⁸ na 180 stopni. Jajca ubijcie ze cukrym, potyn wciepcie²⁹ reszta składnikōw, porzōndnie wymiyszejcie, wlyjcie do ôkrōngłyj formy (moge być tyż ta forma, ze keryj wyłajżōm³⁰ abgeryjty ze dziōrōm poszczodku³¹). Wrojście³² jōm do bratruły na 40-45 minut- dejcie pozōr³³, bo kołżdy piec je inkszy. Jak już baje upieczne, to ze zaftu ze poły citrōłny i pudecukru zrōbcie luker i posmarujcie nasza abgeryjta po wiyrchu. Potyn już yno… smacznego 🙂