Beza ze mango (Po polsku nic innego nie wymyślę)

Poczamu¹ lubia mango? Bo je fajnie arōmatyczne², bo żech go za bajtla³ niy znoł, bo niy je za słodke, … no i całe szczyńście⁴ idzie dobre mango kupić we Polsce. Choć te ludzie, kerym⁵ mango rośnie na zygrōdce⁶, jak widzōm te owoce, kere idzie kupić u nołs⁷ we sklepie , to sie śmiejōm, że takich małych jeszcze niy widzieli. Ale jakbyjście niy chcieli aż tak eksperymyntować, to sie mogecie dać do tyj bezy blank⁸ ajnfachowe⁹ truskawki 😉 A beza? Niy je za suchoł¹⁰, ze wiyrchu¹¹ chrupiōncoł, driny¹² miynkoł¹³… aże ôd tego pisania leci mi ślinka…

Co potrza?

Beza

8 biōłek¹⁴

2 szklōnki cukru

ździebko¹⁵ soli

2 łeżki soku ze citrōłny¹⁶ abo ôctu

Kryjma¹⁷

1 syrek mascarpōne

300-330 śmietōnki

2 łeżeczki żelantyny¹⁸

1 mango

Biōłka ubijcie ze cukrym i solōm na sztywnoł piana, a na sōm kōniec wmiyszejcie tam 2 łeżki soku ze citrōłny abo ôctu. Na blasze- jednyj abo dwōch, zależy jake sroge majōm być te bezy- narysujcie sie na papiōrze do pieczynioł kōłka i potyn nałōżcie na nie ubitoł piana. Na tyn kōnsek, kery bydzie na gōrze, mogecie tyż czyńść piany wycisnōńć szpricōm¹⁹, co by nōm to gryfniyj ²⁰wyglōndało.

Bratruła²¹ sie rozgrzyjcie na 120 stopni i wrojście²² dō ni te bezy. Jak minie pó godziny, to mogecie zmniyjszyć tymperatura na 100 stopni i niech sie ône tam siedzōm tak ze 1,5- 2 godziny. A potyn dejcie²³ tyj bezie chwila na ochōdzynie²⁴.

Tera sie bierymy za kryjma. Rozmiyszejcie sie we poru łeżkach uwarzōnyj²⁵ wody dwie łeżeczki żelantyny. Mango ôbiercie i pokrajejcie²⁶ na małe kōnski²⁷. Śmiytōnka ubijcie, potyn pomału²⁸ dodowejcie²⁹ dō ni mascarpōne (niy miszejcie na za mocnych ôbrotach), a na kōniec wciepcie³⁰ pokrajane mango i żelantyna.

Na dolny placek bezy dejcie kryjma, na wiyrch wrojście³¹ ta drugoł czyńść, cołojść dejcie na chwila do lodōwki i… smacznego 🙂