Ciasto ze cukiniōm (Ciasto cukiniowe)

Cukinia je dobroł na wszysko… to czamu by sie niy narychtować z ni¹ ciasta? Muter² mi pedziała³, że ciotka Eldza moł⁴ recept na ciasto ze cukiniōm⁵, to dzwonia i sie pytōm. Potyn trocha sie tam zmiyniōm i robia eksperymynty na moji Babie⁶ (yno żeby mie feministki nie chyciōły 😉 ) Robiōł żech je już- abo dopiyro- dwa razy, ale za kołżdym razym we kuchni fajnie wōniało⁷ i potyn my wszysko zezarli⁸ 😉

Co potrza?

300 g ôleju⁹ (joł żech doł rołz słōnecznikowy, a rołz żech go pomiyszoł ze rzepakowym)

1 szklōnka cukru (jak lubicie barzi¹⁰ słodke, to mogecie dać trocha wiyncyj)

500 g mōnki pszynny

4 jajca

3 łeżeczki cynamōnu

0,5 łeżeczki soli

3 łeżeczki kakao

kapka arōmatu rumowego (jak mołcie waniliowy abo cuker waniliowy, to tyż moge być)

100 g ôrzechōw

2 łeżeczki proszku do pieczynioł

1 łeżeczka sody

500 g tartyj¹¹ cukinii

Nojprzōd¹² wymiksujcie jajca ze cukrym, potyn wciepcie tam reszta składnikōw, wymiyszejcie, wciepcie¹³ na blacha i wrojście¹⁴ do pieca nagrzōnego na 175-180 stopnia na 45 minut- pod kōniec dejcie pozōr¹⁵,żeby sie niy przipołlōło.

Ô pierzina, chyba żech sam nigdy niy mioł takego krōtkego receptu na ciasto 😉

Jedne co Wōm moga jeszcze pedzieć, to to, że ôrzechy idzie¹⁶ pokrajać na mańsze kōnski i dać rajn¹⁷ abo, jak już ciasto bydzie na blasze, to je powciepować¹⁸ na wiyrch i ône sie tam tak fajnie podpiekōm. Smacznego 🙂