Drożdżowe Hydraulika  (i wszystko jasne ;) )

A z tym drożdżowym to bōło tak: prziszoł rołz¹ hydraulik sprawdzić instalacja i jak łobejrzoł pustoł blacha, to jakosik my sie dali do gołdki² ło pieczyniu. I łon tu narozki padoł³, że moł taki recept⁴ na drożdżowe, co to jego „babcia robiła 100 lat przed wojną”- pedzioł tak, bo to bōł hadziaj⁵, ale że recept bōł fajny, to żech sie go zarozki⁶ zapisoł. Te drożdżowe je tak ajnfachowe⁷, że kołżdymu sie musi udać. Na wiyrch⁸ idzie wciepnōńć byle co, a to wszystko na takim miynkim spodku- Ōłma łod moji Baby by padała: międziutkie 😉

Co potrza?
3 jajca
1 szklōnka cukru
1 szklōnka mlyka
1 szklōnka łoleju
1/2 paczki drożdży  (5 dkg)
3 szklōnki mōnki pszynny

Na wiyrch idzie dać, co Wōm sie uwidzi: jabka, śliwki, brzoskwinie, banany… yno pamiyntejcie, żeby niy bōło tego za kans⁹, bo owoce puszczajōm zaft¹⁰ i żeby Wōm tego ciasta niy przemoczōły.

Do jaki miski na wieczōr wciepcie jajca, cuker, mlyko, łolyj i drożdże. Pomiyszejcie yno byle jak jakōm warzechōm i na całoł noc wrojście do lodōwki- niy, niy ogup żech 😉 Na drugi dziyń wsujcie do tego mōnka, wymiksujcie i odstołwcie do wyrośnięcia (tak ze 1 godzina niech sie to postoji). Włōnczcie sie piec na 180 stopni. Przelyjcie ciasto na blacha, na wiyrch dejcie owoce i rajn¹¹ do pieca na około 40 minut- zależy łod tego, co dołcie na wiyrch, bo niyroz moge i siedzieć we bratrurze¹² godzina. Co tu dużo gołdać, trza wachować¹³, a potyn- już yno smacznego 🙂