Kakaōwka (Kakaowy likier jajeczny)

Idzie pedzieć,^¹ że kakaōwka to je siostra ajerkōniaku, yno że po inkszym fatrze.^² I niby tam wszysko prawie take same, ale sōm ludzie, co to jak im postawić na stole ajerkōniak i kakaōwka, to zarozki^³ sie ciepnōm^⁴ na tyn trocha ciymniyjszy keliszek. Nojlepi mieć i jedne, i druge, to mogecie być sicher,^⁵ że kołżdymu dogodzicie… choć i sam moge być problym, bo trza by mieć jeszcze w barku trocha czystyj i wtedy to już mogōm sie Wōm do dōm ciś^⁶ i nojbarzi rozbestwiōne bezuchy^⁷ 😉

Co potrza?

6 żōłtek

szklōnka cukru

125 g masła

cuker waniliowy abo arōmat (abo trocha gorzołki⁸, we ftoryj bōła^⁹ zamoczōno laska wanilii)

2 łeżki kakao

jedna halba¹⁰ (czystyj)

Moja Teściowo gołdała,^¹¹ że masło trza uciyrać ze cukrym (i cukrym waniliowym) we ceramicznyj misce, ale joł je na to za zgniōły^¹² i żech to wciep do plastikowyj miski i włōnczōł mikser. Za chwila żech dociep^¹³ tam żōłtka, kakao i miksowoł, aż cuker sie rozpuściōł- tak sie strasznie z tym niy smōlcie,^¹⁴ bo jak przidzie gorzołka, to sie to jeszcze lepi rozpuści. Tera wlywejcie pomału ta halba i dali miksujcie. Spróbujcie, czy cuker sie dobrze łozpuściōł,^¹⁵ a jak wszysko sie dobrze połōnczōło, to mogecie^¹⁶ to jeszcze przecedzić bez^¹⁷ sitko- żeby wychycić kołżdy niyrozpuszczōny kōnsek^¹⁸ cukru- i idzie^¹⁹ ta kakaōwka wlywać do flaszki abo jaki krauzy^²⁰– niyftorzi^²¹ nojbarzi^²² lubiōm, jak łona^²³ tak fajnie stwardnie we lodōwce i potyn idzie jōm wylizywać ze keliszka- jak udo Wōm sie ta kakaōwka tam wlołć 😉 Bez to nawet lepi jōm wtedy trzimać we krauzie.

Joł żech jednak je zgniōły do potyngi i jak żech to robiōł na drugi rołz, to żech sie pomyśloł, że trza by sam wynalyjś jeszcze barzi ajnfachowo^²⁴ wersja. Mōm taki blynder ze dzbōnkym^²⁵ i sprōbowoł żech tam noprzōd wciepnōńć żōłtka, masło, cuker, kakao i chwila to poblyndować. Potyn żech tam wloł gorzołka, włōnczōł i to sie robiōło, a joł żech sie mōg nawet i kafeju napić. Wszysko sie idealnie połōnczōło, a w kuchni bōło mani marasu^²⁶– bo jak sie to robi mikserym, to niystety trocha pryskoł. Idzie pedzieć: mocie blynder, to mocie mani roboty 😉

Smacznego abo raczyj: prost! 🙂