Makrōłny ze hazylnisōw (Makaroniki z orzechōw laskowych)

Jak czytołcie ô makrōłnach¹, to na zicher² we gowie mołcie³ te ôdpustowe ze tartyj bōłki, kere yno⁴ arōmatym majōm nōm przipōminać ô mandlach⁵. Take ze prawdziwymi mandlami żech już robiōł i bōły tak dobre, że sie czowiek pomyśloł, że takim jedzyniym to na zicher muszōm futrować⁶ we niebie. A terozki⁷ ôrzechy laskowe- jak żech sie pytoł moji ciotki, jak ôni piyrwy⁸ na nie gołdali, to mi pedziała, że hazylnisy. Sōm take sztele⁹ na Ślōnsku, kaj sie gołdo na nie lyskowe, ale te modsze pokolynie to już jednak barzi¹⁰ idzie w strōna tego polskigo miana¹¹. Te makrōłny sōm wyraźne we smaku, kojarzōm nōm sie ze szokoladōm i świyntami, a do tego sōm jeszcze fajnie chrupiōnce.

Co potrza?

4 biōłka

100 g cukru

200 g mielōnych ôrzechōw laskowych

ździebko¹² soli

Biōłka ze ździebkym soli i cukrym ubijcie na sztywno. Potyn pomału wmiyszejcie do tego ôrzechy. Rozgrzyjcie sie bratruła¹³ na 160 stopni. Mogecie ta masa dołwać na ôblaty- take małe opłatki albo dołwejcie sie jōm łyżkōm na papiōr do pieczynioł. Jak już bajecie fertich¹⁴, to wrojście to do bratruły na 20-25 minut, żeby sie leko przibrōnołciōły¹⁵. Bydōm chrupiōnce z wiyrchu i miynke driny¹⁶… smacznego 🙂