Moczka abo mołczka (Śląski deser wigilijny)

Receptōw na moczka je tyla,¹ co zortōw² piwa abo modeli szczewikōw³ (nojważniysze to do kołżdego znojś odpowiednie porównanie 😉 ). Kołżdo⁴ familia⁵ sie bez lata wyrobiōła⁶ swoja tradycja, a nastympne pokolynia dokłołdały⁷ do ni⁸ swoje składniki. Moja Ōłma⁹ robiōła jōm yno ze suszōnych śliwkōw, jabek i gruszek. Moja Muter dołożōła do tego figi i daktyle. Kedyjś robiyli to na wywarze ze warzyw abo nawet na łebach¹⁰ łod karpia, dzisiej pryndzy na ciymnym piwie. Jako bydzie¹¹ moczka za 100 lołt¹²? Tego niy wiy żołdyn.¹³

Co potrza?

po 10 dkg suszōnych: śliwek (choć jōł żech ich doł akurat 20 dkg, bo te wyndzōne śliwki miały taki fajny arōmat), jabek, gruszek,moreli, figōw, daktyli

10 dkg mandli¹⁴ (płatki abo jake inksze¹⁵– nojważniyjsze, żeby bōły obrane)

10 dkg rodzynek

15-25 dkg piernika do moczki (jak takego niy mołcie, to mogecie dac tyż normalnych piernikōw- bez nadziynia!)

0,5 litra ciymnego piwa (takego bezalkoholowego), co to Ōłma gołdała¹⁶ na nie malcbir¹⁷

1 citrōłna¹⁸

Suszōne owoce (bez rodzynek) wciepcie¹⁹ do gorka, zalyjcie wodōm i trocha powarzcie²⁰, żeby fajnie zmiynkły. Piernik pokrejcie²¹ i zalyjcie piwym. Jak już owoce bydōm uwarzōne, to je przecedźcie- ale niy wylywejcie tego wywaru, bo go przeca²² tyż bydymy²³ używać- i pokrejcie na małe kōnski²⁴. Kedy²⁵ te jabka i gruszki miały pestki abo i szypułki, te je wykrejcie i wytrzajście.²⁶ Potyn wciepcie te suszōne owoce nazod²⁷ do wywaru, dodejcie piernik ze piwym, rodzynki, mandle i wszystko powarzcie razym. Keby Wōm to bōło za mało słodke, to dejcie²⁸ tam trocha cukru. Jak już sie wszysko fajnie wymiyszo, to na kōniec wyciście tam sok ze jednyj citrōłny i fertich. Przijymnego świyntowania i smacznego 🙂