Torta citrōłnowo (Tort cytrynowy)

Z tōm¹ tortōm to już eksperymyntuja² od jakegojś czasu- cojś może jeszcze kedy mi do łeba przidzie³– ale terozki⁴ stanyło⁵ na taki wersji. Ta torta je tako leko⁶, niy za słodkoł, niy za kwaśno, że moja Muter i jyj kamratki⁷ bōły bardzo zadowolōne.

Co potrza?

Biszkopt:

6 jajec

5 łeżek⁸ mōnki pszynny

1 łeżka mōnki kartołflany⁹

6 łeżek cukru

2 płaske łyżeczki proszku do pieczynioł

Do filowania¹⁰ i na wiyrch¹¹:

800 ml śmietōnki¹² 30%

3 śmietanfixy

otarto skōrka z jedny citrōłny

sok ze 2 citrołnōw

3 biołe szokolady¹³ (3x100g)

2 łeżki wōdki¹⁴

połra¹⁵ łeżek cukru pudru- zależy łod tego, jak słodkoł chcecie mieć ta śmiytana

Tyn biszkopt to sie nojlepi już upiyczcie dziyń naprzōd¹⁶. Rozgrzyjcie sie piec na 160 stopni i przigotujcie sie tortownica- jak mołcie¹⁷ tako zamykanoł, to na ta dolnoł czyńść mogecie sie dać tyż piapiōr¹⁸ do pieczynioł.

Biołka łoddzielcie od żōłtek. Przesiyjcie sie ta mōnka i przipomnijcie sie, kaj¹⁹ żeście schowali mikser;)

Do tych biōłek wciepcie²⁰ trocha soli i ubijcie. Pod kōniec wsypcie tam cuker i dalyj ubijejcie. Zmniyjszcie²¹ łobroty²² i po jednym²³ wciepujcie żōłtka. Potyn wsujcie²⁴ tam mōnka i proszek. Tera mogecie to miyszać już nawet przi wyłōnczōnym mikserze samymi kōńcōwkami do ubijania i yno na troszka go włōnczyć na małych łobrotach, co by nōm tyn biszkopt niy opadnōł. Wlyjcie²⁵ go do tortownicy. I rajn²⁶ do pieca na 35-40 minut. Jak bydziecie ta tortownica wyciōngać, to odwrōćcie ta forma do gōry dnym i ściepnijcie²⁷ na stōł (ze 20 abo i 30 cm). I niech sie łona²⁸ tera trocha łodpocznie.²⁹

Na drugi dziyń- a jak niy mołcie aż tyla czasu, to jak te ciasto ochōdnie³⁰– wyciōngcie je z ty formy i przekrejcie³¹ na 3 placki.

Sok ze ty jednyj citrōłny podgrzywejcie³² aż uwre³³ (mogecie tam jeszcze dać ze 2 łeżki wody), a jak ochōdnie, to wlyjcie tam tyż 2 łeżki wōdki. Mogecie sie tam dać i 4 łyżki, ale żeby potyn³⁴ niy bōło, że Wołs³⁵ namołwiōm do picioł.³⁶

Jak już to mołcie fertich,³⁷ to polyjcie tym te placki biszkoptu.

Pod tyn dolny placek połōżcie sie (na tym talyrzu abo paterze, na ftoryj³⁸ późni bydzie stoł³⁹), kōnski⁴⁰ papiyru śniadaniowego- abo i moge być tyn do pieczynioł. Idzie o to, żeby niy pomarasić⁴¹ tego fajnego talyrza, jak bajymy⁴² stroić ta torta. To by bōła gańba⁴³– cały rant⁴⁴ talyrza zmazany⁴⁵.

Ubijcie śmiytōnka, pod kōniec wciepcie tam cuker puder (joł doł⁴⁶ 4 łeżki), śmietanfix i ubijejcie dali⁴⁷. Odłōżcie sie czyńść⁴⁸ ty ubity śmiytany do strojynia⁴⁹, a do reszty nałōżcie ta łotartoł skōrka ze citrōłny.

Posmarujcie tym dolny placek, polōżcie na niego tyn drugi i nałōżcie tam reszta tyj śmiytany ze skōrkōm. Na gōra dejcie 3 placek.

Do garca nalyjcie sie wody, postołwcie na piecu i na to dejcie jako miska abo i inkszy⁵⁰ gornek, kaj bydziecie łozpuszczać⁵¹ ta szokolada. Jak sie już łozpuści, to wlywejcie tam reszta tego soku ze citrōłny i fajnie wymiyszejcie- uważejcie yno⁵²,żeby to niy bōło za rzołdke.⁵³

I terozki trza ta kryjma rozsmarować po całyj torcie. Ta miska abo garniec, kaj je ta szokolada, bez tyn czas nojlepi trzimać na tym garcu ze wrzōntkym, to nōm to za szybko niy stwardnie. Yno sie za dugo ze tym smarowaniym niy bołwcie⁵⁴, bo Wōm ta kryjma⁵⁵ stwardnie⁵⁶ i bydzie po ptokach.⁵⁷ Jak już to bydziecie mieli fertich, to już na Wołs czeko yno⁵⁸ szprica⁵⁹ ze śmiytanōm i Wasz artystyczny talynt. Poszalejcie i smacznego:)