Torta ze mandlami (Tort migdałowy)

Ôstatnio¹ żech przeglōndoł tako fest² staro ksiōnżka kucharskoł, kaj³ bōła⁴ torta, kero⁵ sie nazywała kamiynno. Szło tam prawie kilo mandli⁶, a inkszych⁷ składnikōw małowiela. Trocha mi sie to zdało za droge, ale mie zainspirowało do tyj torty. Je niy za słodkoł, leko⁸ mandlowoł i smak moł fajnie przełōmany dżymym ze czornych jagōdkōw⁹.

Co potrza?

7 jajec

7 łeżek cukru

1 łeżka pudecukru¹⁰

300 ml śmietōnki 30 abo 36%

250 syrka mascarpōne

100 g biołyj szokolady¹¹

krauzka¹² dżymu ze czornych jagōdkōw (choć niyftorzi¹³ bydom na nie gołdać porzeczki)

10 łeżek zmielōnych mandli (ok. 10 dkg)

troszka płatkōw mandlowych do postrojynia¹⁴ torty

4 łeżki mōnki pszynnyj

2 płaske łeżeczki proszku do pieczynioł

Biszkopt nojlepi upiyc dziyń naprzōd¹⁵. Piekymy 2 biszkopty: jedyn ajnfachowy¹⁶, a jedyn mandlowy.

Biszkopt mandlowy:

Ubijcie 3 biołka ze 3 łeżkami cukru na sztywnoł piana, a potyn wmiyszejcie tam pomału 3 żōłtka, 5 łeżek tartych mandli i łeżeczka proszku do pieczynioł. Wylyjcie do formy na torta i wrojście do bratruły¹⁷ rozgrzōnyj na 160 stopni na 30 minut. Po upieczyniu przewrōćcie ta froma do gōry dnym i ôstołwcie¹⁸ na chwila.

Biszkopt ajnfachowy:

Ubijcie 4 biołka ze 4 łeżkami cukru na sztywnoł piana (mogecie tam tyż dlo przełōmania smaku wciepnōńć ździebko soli). Potyn wmiyszejcie pomału 4 żōłtka, 4 łeżki przesiōnyj mōnki i łeżeczka proszku do pieczynioł. Wylyjcie na forma i do rozgrzōnyj na 160 stopni bratruły wrojście na 40 minut. Po upiyczyniu tyż przewrōćcie go do gōry dnym.

Jak ochōdnie (abo na drugi dziyń), przekrejcie tyn ajnfachowy biszkopt na pó na 2 placki i ta wewnyntrznoł strōna kołżdego posmarujcie dżymym (łostołwcie sie go tak ze 2 łeżeczki do strojynia).

We kōmpieli wodnyj (w jaki misce nad gorkym ze wrzōntkym) ôzpuśćcie¹⁹ szokolada i mogecie tam tyż kapnōńć troszka śmiytōnki (2-3 łeżki, a jak mołcie gynsto 36%, to yno jedna łeżka dejcie).

Jak sie fajnie ôzpuści i wymiyszo ze śmiytōnkōm, to mikserym połōnczcie ta biołoł szokolada ze syrkym mascarpōne na gładkoł kryjma²⁰.

Ubijcie reszka śmiytōnki, a jak już baje fertich, to dejcie tam łeżka pudecukru i 5 łeżek mielōnych mandli i wymiyszejcie.

Na spodek przidzie piyrszy placek ajnfachowego biszkoptu z gōry posmarowany dżymym. Poła²¹ ubityj śmietōnki ôzsmarujcie²² na biszkopcie mandlowym i tōm posmarowanōm strōnōm wciepcie go na posmarowanoł dżymym strōna ajnfachowego. Tera przidzie warstwa śmietōnki i na nia klapnijcie drugi placek ajnfachowego biszkoptu (dżym do śmiytōnki).

Terozki po wiyrchu i na bokach ôzsmarujcie ta kryjma ze mascarpōne.

Jak już wszyjsko baje²³ fertich²⁴, to ôstanie²⁵ już yno strojynie. Poukłołdejcie po wiyrchu²⁶ trocha płatkōw ze mandli i porōbcie kryski ze dżymu- żeby sie lepi ôzprowadzoł²⁷, to żech go trocha podgrzoł ze 2 łeżeczkami wody i jak sie zrobiōł rzołdszy²⁸, to już fajnie szło nim po tyj torcie pokapać.

Smacznego 🙂