Windbojtle (Ptysie)

Już dołwno żech niy zaglōndoł do tyj staryj ksiōnżki ze receptami¹, kero mi pożyczōła kōmratka² od moji Mutry³. Ksiōnżka ta moł w tym roku 90 lołt i bez to werciōłoby⁴ sie cojsik z ni upiyc, tym barzi, że nawet Pani Truda- bo tak sie nazywo ta kōmratka- gołdała mi, że sie mōm zrobić te windbojtle. Robi sie je szybko, a rajn⁵ idzie wciepnōńć byle co. Joł żech robiōł już ze ślagzanōm⁶, kryjmōm z pudingu, a nawet na słono ze pastōm ze łososia. Jak byjście chcieli sie zrobić filowane⁷ czym słōnym, to do ciasta niy dołwejcie cukru ani arōmatu waniliowego. Take windbojtle sōm tak ajnfachowe⁸, że nawet bajtle umiōm je narychtować- sōm żech to widzioł 😉

Co potrza?

125 g masła

125 g mōnki pszynnyj

250 ml wody

3 jajca

1 łeżeczka proszku do pieczynioł

1 łeżka cukru

1 łeżeczka cukru waniliowego abo kapka arōmatu

Do gorka wlyjcie woda, masło, dejcie cuker, cuker waniliowy i niech sie to zacznie warzić⁹. Potyn wsujcie tam mōnka i cały czołs miyszejcie, aż zgynstnieje. Terozki trza to ochōdzić¹⁰.

Niyskorzi¹¹ wejście sie mikser, przełōżcie ta masa do jaki miski, wmiyszejcie do ni po jednym te jajca i dejcie proszek do pieczynioł.

Rozgrzyjcie bratruła¹² na 200 stopni, przigotujcie sie 2 blachy, wyłōżcie na nich papiōr do pieczynioł i małōm łeżeczkōm nakłołdejcie na blacha po trocha tyj masy. 1 połno łeżeczka to jedyn windbojtel i pamiyntejcie, żeby ich niy kłajś¹³ za gynsto, bo jak zacznōm rojś, to sie Wōm posklejajōm. Te blachy nojlepi piyc osobno. Wkłodejcie do pieca na 20 minut, a potyn mogecie trocha uchylić dwiyrze¹⁴ łod bratruły i je posuszić¹⁵. Pamiyntejcie, że czas pieczynia zależy łod pieca. Jak już te piyrsze bydōm upieczōne, to zajś rozgrzyjcie ta bratruła (bez ta uchylōnoł klapa mōg nōm kajś¹⁶ uciyc tyn hic¹⁷) i drugo blacha piyczcie tak samo.

Jak już windbojtle bydōm fertich,¹⁸ to mogecie sie rajn dać ubito śmiytōnka ze pudecukrym¹⁹ (wiela go dać, zależy łod tego, jak lubicie słodke) abo jako Wōm sie yno uwidzi²⁰ kryjma. Smacznego 🙂