Golōnka ze piwym (Golonka piwna)

Mōmy pajździernik, a kedyjś bez^¹ duge lata gołdało^² sie na Ślōnsku na niego Oktōłber. A jak Oktōłber, to Oktōłberfest, jak Oktōłberfest, to piwo, a nojlepszym kamratym^³ łod piwa je golonka. Joł żech sie pomyśloł, że tych 2 kōmpanōw^⁴ wciepna^⁵ razym do gorka i niech się tam trocha pokōmpiōm.^⁶ To bōł^⁷ piyrszy rołz^⁸, jak żech robiōł golōnka, ale musza pedzieć,^⁹ że chyba byda dō ni niy rołz, niy dwa wrołcoł.^¹⁰ Je to proste, niy je take słone, jak te gotowe golonki, je fajnie miynke, a do tego mołcie^¹¹ wywar, ze ftorego^¹² sie idzie potyn^¹³ zrobić zupa- joł robiōł kapuśniōk, ale o tym to już opowiym kedy indzi^¹⁴ 😉

Co potrza?^¹⁵

ze 3 kg golōnek- nojlepi tylnich, bo te ze przodku to majōm nirołz^¹⁶ yno same kojści^¹⁷ i fet.
1 abo 2 piwa (zależy łod tego, jak lubicie tyn arōmat i ta leko^¹⁸ goryczka)
połra^¹⁹ ziorek ziela angelskego
połra listkōw bobkowych^²⁰ ( abo jak tyż niyftorzi^²¹ gołdali: lorbelblatu)
połra ziorek pieprzu
sōl
2 łeżki mostrichu^²²
1-2 łeżki miodu
woda

Jak byjście sie potyn chcieli z tego zrobić zupa, to pod kōniec warzynia mogecie do tego wywaru wciepnōńć^²³ tyż ze 2 marchewki, pietruszka i zeler.^²⁴ Boryj^²⁵ łostołwcie^²⁶ sie do zupy. Joł do ni łostawiōł tyż jedne golonko, żeby bōło we środku tyż trocha miysa.^²⁷

Niyftorzi pyjklujōm^²⁸ te golōnki, mie sie jakosik niy chciało. Umōł żech je, wciep do garca, zaloł piwym i wodōm (muszōm być całe przikryte), wciep tam prziprawy i sie warzōły^²⁹ bez 2 godziny. Kebyście chcieli, to na łostatnie pó^³⁰ godziny mogecie tam wciepnōńć tyn grincojg.^³¹
Potyn żech te golōnka wyciōng, ściōng żech ta tustoł^³² skōra, położoł na blacha i rozgrzoł żech piec (funkcja grill abo jak łonyj^³³ niy mołcie, to sie go rozgrzyjcie na 200 stopni).
Mostrich żech pomiyszoł ze miodym ( idzie tam wlołć^³⁴ tyż ze 2 łeżki wywaru i dać trocha soli) i tym żech fajnie posmarowoł te golōnki po wiyrchu.^³⁵
Doł żech je do pieca na jake pó godziny- ale jakbyjście widzieli pryndzy, że sie za mocno brōnołcōm,^³⁶ to je wyciōngcie- i po robocie. Do tego trocha mostrichu, chrzanu, jako bōłka i wiyncyj niy trza… no, może jeszcze kufel piwa 😉 Smacznego 🙂