Grinkōłl choby we Niymcach (Jarmuż na modłę północno-niemiecką )

We Niymcach- tam barzi^¹ na gōrze- majōm tako tradycja, że bez zima^² sie wybiyrajōm całōm ferajnōm^³ na jedzynie tego grinkōłlu. Jo żech po prołwdzie^⁴ nawet tego niy wiedzioł, ale jakosik żech sie połra miesiyncy tymu zgodoł ze mojōm Ciotkōm ze Bremen. Po piyrszych przimrozkach pōnoś^⁵ tyn grinkōłl je nojlepszy i łoni tak od stycznia aże do marca sie organizujōm take fajery.^⁶ Bajeroki^⁷ majōm Oktōłberfest, a ci a łoni tam taki Grinkōłlfest. Kamraty^⁸ i kōmratki^⁹ ze roboty sie noprzōd^¹⁰ idōm na zakrołpiany szpacyr,^¹¹ a potyn- jak już im trocha rzić wymarznie- idōm sie pojejś. Niy musza spōminać,^¹² że abstynynci niy majōm na takich imprezach leko 😉

Co potrza?

30-40 dkg grinkōłlu, co to na niego niyftorzi godajōm jarmuż 😉

1 cebula

2 wōszty^¹³– łoni tam dołwajōm^¹⁴ do tego taki wōszt, co to sie nazywo pinkel i je takōm odmianōm krupnioka, yno, że je bioły; joł żech takego niy mioł i dołech normalnego wōsztu i tyż bōło dobre

4 plastry wyndzōnki¹⁵

2 plastry schabu

trocha fetu^¹⁶ abo masła klarowanego

trocha wody abo buliōnu

połra^¹⁷ kartołfli^¹⁸

Roztomajtych receptōw to łoni tam majōm tela, co my na panczkraut i jak zawsze mogecie sie sam tyż trocha poeksperymyntować. Nojprzōd na fecie abo maśle zeszklijcie pokrōno^¹⁹ cebula, potyn dociepcie tam umyty i potargany na mańsze^²⁰ kōnski^²¹ grinkōłl (te twarde łodygi tyż wyczajście^²²). Dolyjcie do tego trocha wody abo buliōnu, ale niy za dużo, żeby sie niy zrobiōło za ciapiate.^²³ Moja Ciotka padała,^²⁴ że łoni tam tyn wōszt warzōm osobno i dopiro na kōniec wciepujōm do garca razym ze grinkōłlym. Joł tyn wōszt podziuboł^²⁵ i razym ze wyndzonkōm wciep żech tam zaroz po tyn, jak te zielōne trocha oklapło. I tera sie to powinno 1- 1,5 godziny dusić na blank²⁶ małym łogniu. Bez²⁷ tyn czas mogecie sie to tyż połra razy jakōm warzechōm pomiyszać. Jak już minie godzina, to idzie²⁸ sie uwarzić kartołfle, a pod kōniec podsmażcie trocha na patelni tyn schab i dejcie go na chwila do tego grinkōłla- pōnoś jakby sie tam za dugo dusiōł, to bōłby za suchy. Jak już wszysko mōmy fertich²⁹ to wciepujecie to na talyrz, bierecie sie trocha mostrichu,³⁰ jake piwo i smacznego 🙂

Mogecie tyż- jak joł z mojōm Babōm³¹– zrobić sie tyn grinkōłl yno ze wōsztym i wyndzōnkōm. I bez tego schabu tak my sie pojedli, że sie ruszać niy szło 😉