Karminadle jak dlo grołfa (Kotleciki hrabiowskie)

Łostatnio żech robiōł^¹ kans^² ajerkōniaku i inkszych kakaōwkōw, a jak byjście przesztudiyrowali^³ te recepty,^⁴ to zarozki byjście sie pomyśleli, co tyn borołk^⁵ robi z tymi wszyskimi biołkami- przeca porzōndny Ślōnzok niy wyciepnie^⁶ jedzynia, a świniōw ani inkszyj zwierzyny niy mōm. To żech sie pomyśloł, że trza tym wyfutrować dōmownikōw- bōłech wtedy u Teściowyj, a wiadomo, że na teściowych sie robi nojlepsze eksperymynty 😉 A jak Teściowo pedziała jeszcze, że bōło dobre, to musi być to na zicher^⁷ udany eksperymynt 🙂

Co potrza?

12 biołek

500 g mielonego miysa- jo miołech^⁸ ze hańdyka^⁹

150- 200 g tartego żōłtego syra

1 cebula

1-2 zōmbki czosku

1 łeżeczka musztardy

2 łeżki zielōw prowansalskich

4 łeżki kartofylmyjlu^¹⁰

4 łeżki tartyj bōłki

sōl -nojmani jedna płaskoł łeżeczka

pieprz abo jak to dołwni gołdali^¹¹: korzynie

łolyj^¹² do pieczynia

Ubijcie sie te biōłka ze solōm na piana i dejcie dō ni^¹³ potyn kartofylmyjl. We drugi misce połōnczcie sie mielōne miyso, syr, prziprawy, tarto bōłka, pokrōno cebula, wyciśniynty czosnek i musztarda- mogecie to tyż zrobić mikserym, co sie mołcie trołpić^¹⁴ miyszaniym. Tera dokłodejcie do tyj miyszanki ubito piana i na małych obrotach miksujcie, aże sie wszysko połōnczy. To niy bydōm take richtig^¹⁵ karminadle, co to sie je łobtoczo^¹⁶ we tartyj bōłce, bo łone sōm na to trocha za miynke i bez to na rozgrzōno patelnia dołwo sie je łeżkōm abo warzechōm, trocha jak placki. Jak sie fajnie przibrōnołcōm^¹⁷ ze jednyj i drugi strōny, to mogecie siadać do stoła. Ku tymu^¹⁸ mogecie sie zjejś i uwarzōne kartołfle,^¹⁹ i jako kasza, ale i- jak to czynsto sie u Chopa zdarzo- jako dobro bōłka abo chlyb. A szałołt to sam przipasuje tyż kołżdy- no, może tyn ze rybōm niy, ale inksze już ja 😉