Tyn recept1 je richtich2 ajnfachowy3. Tak mie jakoś naszło, żeby dziyń pryndzyj zamarynować piersi ze kaszki we mostrichu i musza pedzieć4, że to bōła dobrŏ idyja 🙂
Co potrza?
dwie piersi ze kaczki (jŏ tyla mioł, a Wy mogecie mieć mani abo wiyncyj 😉 )
łeżka mostrichu
łeżka lubczyku suszōnego abo gałōnzka świyżego
łeżka zielōw prowansalskich
pŏra łeżek śmiytōnki
ździebko kartofylmyjlu5 do zagynszczynia zōłzy6
Dziyń pryndzyj natrzyjcie kaczka mostrichym. Na drugi dziyń leko jōm obsmażcie na tyglu7– żeby sie yno zbrōnŏciōła8 i pozamykały pory miysa. Potyn dejcie do brytfanki trocha wody, prziprawy, kaczka i niech sie to na małym ôgniu powarzi- tak aby godzinka. Tera się bierymy za nastympny etap. Jŏ żech wyciōng same miyso i doł do airfryera, choć idzie tyż je dać do bratruły9. To bōło take 20-25 minut na 180 stopni. Bez tyn czŏs żech odloł tuste ze zōłzy i ôstoł yno tyn wywar ze miysa. Dołech tam śmiytōnka i jak sie tyn wywar zawarzōł, to żech zagyńściōł zōłza łeżeczkōm mōnki kartoflanyj łozmiyszanyj we zimnyj wodzie. Mogecie jeszcze to leko doprawić- choć mie to już stykło, bo bōło fajnie arōmatyczne. Niy czuć mocno samego mostrichu, ale jeszcze z tymi prziprawōma całŏjść mŏ richtich fajny smak. Smacznego 🙂
1przepis
2naprawdę
3prosty
4powiedzieć
5mąki ziemniaczanej
6sosu
7patelnia
8przyrumieniła
9piekarnika
Dodaj komentarz