Gańś ze żurawinōm i gruszkōm (Gęś z żurawiną i gruszką)

Gańś je dobroł niy yno na świyntego Marcina- moł¹ dobry smak, a ôd² ni³ miyso i fet⁴ sōm⁵ tyż richtich⁶ zdrowe. Moł kans⁷ niynasysōnych kwasōw tłuszczowych- przede wszyskim omega 3, ftory pomołgo⁸ nōm ze tym niyfajnym cholesterolym, a bez to⁹ je dobry i na serce. Niy idzie gańsi jejś za kans, ale fto by sie to tyż mōg lajstnōć¹⁰ 😉 Na ta zōłza¹¹ żech prziszoł bez cufal¹², ale to bōł taki cufal, jak kej¹³ byjście znodli¹⁴ na drōdze 50 złoty 😉

Co potrza?

2 szłapy¹⁵ ôd gańsi

1 gruszka

gorść¹⁶ żurawiny – joł mioł świyżoł, ale mogecie dać tyż suszōnoł

keliszek rōżowego wina

keliszek wody

łeżeczka majeranku

łeżeczka tymianku

sōl i pieprz

Gańś nojprzōd¹⁷ podpiyczcie na suchyj patelni- ôna zarozki¹⁸ puści kans fetu i nojlepi go zbiercie sie do jakigo gorczka¹⁹ abo azjetki²⁰ i mogecie sie go niyskorzi²¹ do czego użić²². Potyn wciepcie²³ te szłapy do brytfanki ze pokrōnōm²⁴ gruszkōm, żurawinōm, winym, wodōm i prziprawōma i niech sie to tak aby ze godzina na małym ôgniu dusi. Potyn wyciōngcie²⁵ ta gańś i dejcie na 10-15 min do rozgrzōnyj na 200 stopni bratruły- żeby sie nōm fajnie spiykła ôd ni skōrka. Bez tyn czas mogecie sie tyż rozrobić w zimnyj wodzie trocha mōnki i zagyńścić niōm zołza. Do taki gańsi mogecie sie zjejś klōski, nudle, ryż i co jeszcze Wōm yno przidzie do gowy. Smacznego 🙂