Krewetki ze bananowōm zōłzōm (Krewetki w sosie bananowym)

Sōm¹ dania, ftore² czowiek jy³ ze smakym, a sōm take, przi ftorych wyglōndōmy⁴ choby⁵ bajtle⁶, kere⁷ wyciōngajōm gyszynki⁸ spod choinki (choć może i niyftorzi⁹ by pedzieli- kristbaumu). Jak żech prziszoł¹⁰ na ta zōłza? Do kōńca niy wia… możno to bōły te banany, kere leżały na fynsterbrecie¹¹… Nojważniyjsze je¹² to, że krewetki w taki zōłzie sōm tak dobre, że niy dojś¹³, że żech wypucowoł do czysta cały talyrz, to żech jeszcze sie wziōn¹⁴ za wytōnkiwanie¹⁵ resztkōw ze patelni.

Co potrza?

500 g krewetkōw

1 banan

1 keliszek wina

100-150 ml śmiytōnki

ździebko¹⁶ curry

ździebko chili

1 cebula

1 zōmbek czosku

1 łeżka masła klarowanego

3 łeżki oliwy

trocha pokrajanyj¹⁷ natki pietruszki

Na maśle klarowanym i oliwie zeszklijcie pokrajanoł cebula, dociepcie¹⁸ do tego wyciśniynty czosnek, pokrajanego byle jak banana (bez skōry) i niech sie to chwila posmażi. Potyn zalyjcie¹⁹ to winym, a jak trocha ôdparuje, wciepcie²⁰ krewetki i prziprawy. Niech to sie tak ze połra minut powarzi²¹, a niyskorzyj²² wlyjcie tam śmiytōnka (yno jōm wprzōd zahartujcie- wlyjcie dō ni trocha gorkyj²³ wody abo zōłzy- żeby sie niy zwarzōła²⁴). Dociepcie do tego jeszcze natka, niech sie ze 2-3 minuty powarzi na małym ôgniu i mogecie sie brać za jedzynie- do tego potrzebnoł je yno jako dobroł bōłka abo trocha ryżu. Smacznego 🙂