Kura we rieslingu (Coq au riesling ;) )

Jak już po mianie¹ widać, ftojś² te jołdło³ wynołkwiōł⁴ we Francji, a dokładnij we Alzacji, co to leży przi samyj granicy ze Niymcami. Wina riesling to chyba żołdnymu⁵ przedstawiać niy musza, bo to przeca nawet nasze ōłpy⁶ już za starego piyrwy⁷ piyli niymiecke rieslingi. We Alzacji tyż majōm podobne zorty⁸ wina, ale te danie moł kans⁹ wpōlnego ze inkszymi¹⁰ daniami francuskimi, kaj¹¹ tyż sie leje do garca dojś¹² wina. We Burgundii majōm coq au vin- co by szło przetłumaczyć na ôżarto¹³ kura- ale tam we gorku pływoł czerwōne wino, bo to przeca¹⁴ je regiōn, kery¹⁵ sie asi¹⁶ właśnie takim winym. Do tego drugigo receptu¹⁷ jeszcze kedy przidymy, a tera sie bierymy za nasza kura we rieslingu.

Co potrza?

1 kg kurczaka- nojlepi filet ze podudzi abo piersi

15-20 dkg wyndzōnki¹⁸

połra łeżek mōnki¹⁹

ze 2 łeżki masła klarowanego

2 łeżki masła

2 łeżki oliwy

3 szalotki abo jake inksze cebule

25 dkg pieczarkōw

2-3 łeżki kōniaku abo brandy

0,5 litra wina riesling (nojlepi wytrawnego- jakby co, moge być tyż półwytrawne)

20-25 ml śmietōnki (moge być krymōwka abo i jako chudszoł)

3-4 liście bobkowe²⁰

sōl i pieprz

natka ze pietruszki

Na sōm poczōntek pokrejcie²¹ wyndzōnka we kostka i podpiyczcie na patelni. We wiynkszym gorku, we ftorym bydymy potyn to wszyjsko rychtować²², mogecie zeszklić na maśle (tym normalnym) i oliwie pokrōnoł cebula. Jak już nōm sie ta wyndzōnka fajnie podpieke, to tyż jōm tam wciepcie²³. Tyn gornek mogecie symnōńć²⁴ ze ôgnia, co by nōm sie cebula niy przipołlōła²⁵. Niyskorzi²⁶ sie bierymy za pieczarki- pokrejcie je we plasterki, podpiyczcie na patelni ze masłym klarowanym i przeciepcie²⁷ do garca. Tera ôstoł²⁸ nōm już yno kurczak (jak mołcie²⁹ filety ze podudzi, to nawet ich niy trza krajać na mańsze kōnski³⁰, a filet ze piersi mogecie pokrajać na szyroke³¹ paski). Niyskorzi pokulejcie³² go trocha we mōnce i wciepcie na patelnia- dajcie na nia yno ździebko³³ masła klarowanego, to wtedy niy bydzie tak pyrskać³⁴. Jak już sie kurczak przipieke³⁵, to tyż go wczajście³⁶ do gorka. Potyn wlyjcie³⁷ kōniak do jaki kelni³⁸ abo gorczka, podgrzyjcie i (UWAGA!) podpołlcie³⁹. Jak sie baje⁴⁰ połlić, to gichnijcie⁴¹ tym to wszyjsko, co mocie we gorku. Jak sie wypołli (tyn sznaps⁴², a niy Wasza kuchnia 😉 ) to wlyjcie do gorka wino, wciepcie prziprawy i niech sie to tak na małym ôgniu bez pó godziny popykoł⁴³. Niyskorzi wyciōngcie miyso na jaki talyrz i dejcie⁴⁴ do gorka śmiytana- trza by jōm pryndzyj trocha zahartować, a to znaczy wlołć do ni trocha zōłzy⁴⁵ i wymiyszać. Mogecie tyż potyn trocha zagyńścić nasza zōłza mōnkōm (rozfyrlejcie⁴⁶ jōm we zimnyj wodzi i gichnijcie do gorka). Jak już bydzie fajnie gynstoł⁴⁷– sōm take kuchołrze, co by to zagynszczali yno bez ôdparowanie wody, ale jôł je chyba na to za zgniōły⁴⁸ 😉 – to ôstało nōm już yno dosmakowanie, pokrajanie pietruszki na wiyrch⁴⁹ i mogymy sie brać za futrowanie⁵⁰. Takoł kura mogecie zjejś ze bagetkōm, klōskōma, nudlami⁵¹ abo jako tam chcecie. Mie już ôstało yno napisać: smacznego 🙂