Kura we tōmacie i prawdziwkach (Kura w pomidorach i prawdziwkach)

Te danie to tak po prołwdzie¹ je kura ze suszōnymi² tōmatami i prawdziwkōma, ale wiadōmo, że te miana³ za duge być niy mogōm, a u mie i tak już niyrołz zalatuje barokym⁴. Suszōne tōmaty majōm cojsik fajnego we smaku, czego niy idzie sie doszukać we takich świyżych, do tego jeszcze arōmatyczne prawdziwki i… juzajś⁵ mi ślinka cieknie.

Co potrza?

1 kg podudzi ze kurczaka- nojlepi filetōw

gorść⁶ suszōnych tōmatōw (niy muszōm być take we zalywie, choć te ze krauzy⁷ tyż mogōm być)

gorść prawdzikōw

15-20 dkg wyndzōnki⁸

1 cebula

keliszek czerwōnego wina

trocha oliwy

sōl i pieprz (soli yno troszka, bo wyndzōnka baje fest słōnoł)

mōnka do zagynszczynia zōłzy

ewyntualnie trocha śmiytōnki

Pokrejcie⁹ wyndzōnka we kostka i przipiyczcie¹⁰ na patelni. Przeciepcie jōm do jakego wiynkszego gorka, a na patelnia wlyjcie¹¹ trocha oliwy i zeszklijcie pokrōno cebula. Dociepcie jōm¹² do wyndzōnki. Na patelnia- prawie sucho- przidōm tera kōnski¹³ kurczaka. Przipiyczcie je trocha i wrojście¹⁴ do gorka. Wlyjcie tam tyż keliszek wina, trocha wody, wciepcie tōmaty, prawdziwki (pokrōne na mańsze¹⁵ kōnski), sōl, pieprz i niech sie to na małym ôgniu aby ze pó godziny (a nojlepi i ze godzina) popykoł¹⁶. Niyskorzi¹⁷ mogecie zagyńścić trocha ta zōłza mōnkōm (nojprzōd trza jōm rozfyrlać¹⁸ w zimnyj wodzie) i fertich¹⁹. Kebyjście niy mōgli żyć bez śmiytōnki, to pod kōniec mogecie ji tam tyż dac połra²⁰ łeżek, ale i bez tego ta zōłza bydzie miała richtich²¹ dobry smak. Do tego idzie zjejś klōzki, nudle²², kartołfle²³ abo i jako fajno żymła²⁴. Smacznego 🙂