Pizza ze cukiniōm (Pizza z cukinią)

Niyftorzi zajś pedzōm¹: co to łon sie normalnyj pizzy narychtować² niy poradzi, yno cały czołs³ musi tak wynołkwiać?⁴ 😉 Dyć joł wiym, że pizza ze szinkōm, keczupym i syrym to nawet małe bajtle umiōm zrobić, a joł zajś bych chcioł Wołs nakusić na eksperymynty. Tyn mōj je delikatny, ale arōmatyczny, a jak sie do tyj chopowyj pizzy jeszcze napijecie keliszek dobrego biołego wina, to wieczōr bydzie udany 😉

Co potrza?

Ciasto na jedna łokrōngłoł pizza:
1 szklōnka mōnki pszynny ( od 405 do 600- numer na pakiecie)
1/3 szklōnki mlyka
1 dkg drożdży
trocha soli
pó⁵ łeżeczki cukru
2 łeżki oliwy

Wiyrch⁶:
1 małoł cukinia

pó wyndzōnyj piersi ze kurczaka (abo jedne udko)

15 dkg mozarelli abo tartego żōłtego syra

połra gałōnzek natki pietruszki 

Zōłza:

pó awokado

1 tōmata⁷

trocha chili, pieprzu, soli i bazylii

 

Na wiyrch po upieczyniu:

pó łeżeczki orygano⁸

 

Mōnka przesujcie⁹ do jaki miski- mogecie jōm tyż przesiołć. Na pośrodku zrōbcie dziura i wlyjcie dō ni letnie mlyko, dejcie cuker i pokruszcie drożdże. Tera odstołwcie to na 10-15 min., coby te drożdże zaczły robić. Joł włōnczōł na chwila piekarnik (bratruła) na 50 stopni i jak sie leko rozgrzoł, to dołem tam ta miska, bo tam lepi te ciasto rośnie.
Niyskorzi dejcie do tyj miski trocha soli, 2 łeżki oliwy i wyrōbcie jednolite ciasto- keby sie za kans¹⁰ klejōło, to mogecie jeszcze dosuć¹¹ trocha mōnki. Tera zajś trza je łodstawić i to tak na aby 40 min.
Jak już nōm fajnie urosło, to sie wejście¹² nudelkula¹³, posypcie na stolnica abo blat trocha mōnki i rozkulejcie sie ta pizza na łokrōngło. Tera idzie sie domyśleć, że zajś jōm na chwila dōmy we ciepłe miejsce.
Tera mołcie czas na zōłza. Łobrane awokado, tōmata bez skōry i prziprawy wciepcie do blyndera, włōnczcie… i po robocie- no dobra, mogecie sie to jeszcze dosmakować.

Cukinia pokrejcie na duge ciyńke połski¹⁴ abo we ajnfachowo¹⁵ kostka, kurczaka na małe kōnseczki. Syr zetrzijcie.¹⁶ I rozgrzyjcie piec na 225-230 stopni.

Jak już te ciasto nōm trocha podrojśnie, to posmarujcie je narychtowanōm zōłzōm, na wiyrchu pociepejcie cukinia i kurczaka, a na to wszysko jeszcze syr i do pieca na 15-20 minut. Yno dejcie pozōr, żeby sie Wōm ta pizza niy przipołlōła, bo te bratruły to lubiōm robić wice¹⁷. Jak sie fajnie przibrōnołci, to jōm wyciōngcie, posujcie po wiyrchu orygano i smacznego 🙂