Carske ajerkuchy (Bliny)

Jak czowiek czyto wschodnie ksiōnżki i patrzy na te ichniyjsze filmy, to ôni¹ tam co chwila jōm² bliny. I sie tak potyn myślymy, co to je za pierziństwo, a tak po prołwdzie³, to to sōm⁴ take normalne ajerkuchy⁵, yno, że na drożdżach i ze mōnkōm gryczanōm. Robi sie je dojś⁶ szybko-yno trocha wiyncyj czasu potrza⁷ na to, aże te drożdże zacznōm robić, ale wtedy przeca sie mogecie wlyjś⁸ na fejsbuka 😉

Co potrza?

połno⁹ szklōnka mōnki gryczanyj

wiynksze pó¹⁰ szklōnki mōnki pszynny

niycałoł szklōnka wody

szklōnka mlyka

2 dkg drożdży

1 jajco

50 g ôzpuszczōnego¹¹ masła

trocha soli

łeżeczka cukru

masło klarowane (do pieczynia)

Na wiyrch:

gynsto¹² śmiytōnka¹³

wyndzōny łosoś

kawior

…

Na suchoł patelnia wciepcie¹⁴ mōnka gryczanoł i jōm trocha przipiyccie- ale niy na miał¹⁵ 😉 Potyn pomiyszejcie jōm ze wodōm we misce i dosujcie do tego mōnki pszynny. Mlyko podgrzyjcie leko we gorczku¹⁶, rozpuście tam drożdże i cuker. We misce, kaj sōm mōnki, na pośrodku zrōbcie dziura i wlyjcie tam mlyko ze dodatkami. Ôstołwcie¹⁷ to pod jakim ryncznikym we ciepłym miejscu na 20 minut.

Potyn dociepcie¹⁸ tam jajco, ôzpuszczōne masło i fajnie to wymiksujcie. Tera zajś¹⁹ by trza to ôdstawić na aby 0,5 godziny (we Rusyji majōm wiyncyj czasu, to mogōm to tak czimać²⁰ i 3 godziny 😉 ). Niyskorzi rozgrzyjcie patelnia, dejcie na nia trocha masła klarowanego i piyczcie za kołżdym razym 4 niy za sroge²¹ placki.

Na wiyrch takego ruskego ajerkucha idzie wciepnōńć byle co, te nojbarzi klasyczne sōm ze śmiytōnkōm i kawiorym abo łososiym. Choć jak ludzie mieli tam biyda, to byli radzi, jak sie takego blina zjedli i ze ôzpuszczōnym masłym. Smacznego!