Żeberka we coli

Niyftorzi¹ jak słyszōm miyso² na słodko, zarŏzk³ krziwiōm, a jŏ Wōm powia, że to je richtich⁴ dobre. A jak jeszcze bydōm te żeberka fajnie zapieczōne ze glazurōm ze tartymi ôrzechami laskowymi i miodym, to yno je wmōcić⁵ 😉

Tyn recept⁶ je inspirowany kuchniōm hamerykańskōm, ale jak bydziecie je jejś, to tyn kōwbojski hut⁷ mogecie seblyc⁸ 😉

 

Co potrza?

żeberka wieprzowe – mie ich do koszyka wskoczōły 2 kg, ale żech mioł niyskorzi⁹ pŏra pōmocnikōw przi stole

aby¹⁰ liter coli- yno Wŏs¹¹ prosza, żeby niy bōła to ta bez cukru, bo wtedy to nawet niy umia sie wyforsztelować¹², co by Wōm z tego prziszło

sōl i pieprz

pó¹³ łeżeczki kminu rzymskego abo kminku

łeżeczka tymianku

pŏra liści bobkowych¹⁴

ździebko¹⁵ chili

połra¹⁶ łeżek miodu

połra łeżek keczupu (jŏ żech mioł taki ze tymiankym, czoskym i miodym)

gŏrść¹⁷ pomelanych¹⁸ ôrzechōw laskowych (jŏ żech je przepuściōł bez maszynka do miysa)

Pokrejcie¹⁹ żeberka na mańsze²⁰ kōnski²¹ i wciepcie do gorka. Zalyjcie kolōm, dejcie tam trocha soli, pieprzu, chili, liści bobkowych i kminu. Niech sie to powarzi na małym ôgniu tak aby ze dwie godziny.

Wymiyszejcie miōd, keczup, ôrzechy i ździebko chili. Łozgrzyjcie bratruła na 180 stopni (nojlepi na opcji grill). Potyn wyciōngcie te kōnski miysa na blacha i posmarujcie glazurōm. Przipiykejcie te żeberka tak ze 20-30 minut aż się fajnie przibrōnŏcōm, a potyn już yno biercie sie za jedzynie. Ta glazura je takŏ intynsywnŏ, że styknie jak bydzie ze jednyj strōny. Smacznego!

PS A tyj zalywy niy wylywejcie, bo sie narychtujymy ś ni fajnŏ zupa 🙂