Tarta po lotaryńsku (Quiche Lorraine)

Piyrszy rołz jołd¹ żech takoł tarta we Lotaryngii (to je tyn regiōn zaroz przi Niymcach) i tak mi łōna² zasmakowała, że musiołech sie jōm niyskorzi³ tyż narychtować⁴. Połra razy już żech z tōm tartōm eksperymyntowoł- rołz mi nawet śleciała⁵ na dylōwka⁶… ale i tak my jōm zjedli 😉 Joł robia zawsze ta wersja tarty dlo tych barzi zgniōłych⁷ kucharzy i niy czekōm godzinōma, aż mi sie ochōdzi⁸ ciasto, ani niy wciepuja na nie jakijś tam fasolkōw, bo by my chyba bez tyn czas z mojōm Babōm sie z godu poprzełwrołcali. We Francji robiōm tarty na słōno i słodko, a jak łona je na słōno, to gołdajōm⁹ na nia quiche [czyt. kisz].
Co potrza?

Spodek:¹⁰
180 g mōnki pszynny
80 g masła
trocha wody (2-3 łeżki )
pó¹¹ łyżeczki soli

Na wiyrch:
150-200 g wyndzōnki¹²
2 jajca
200-250 ml śmiytōnki  (joł tam lubia 36%)
100-150 g potartego żōłtego syra (we Francji robiōm ta tarta ze szwajcarskim syrym gruyère, a łon je taki barzi łostrzyjszy, ale tyż i ciynżko go kupić; joł dołwōm czynsto normalno gouda)

sōl i pieprz
ździebko gałki muszkatałowyj

Nojprzōd spodek. Wciepcie¹³ wszyske składniki do miski i wyrōbcie na jednolitoł masa. Potyn wejście sie 2 kōnski¹⁴ papiōru do pieczynioł, wrołźcie¹⁵ sie pomiyndzy te ciasto i nudelkulōm rozwałkujcie na łokrōngło.¹⁶ Włōnczcie sie piec na 200 stopni. Jedyn papiōr ściepcie¹⁷ i tōm sebleczōnōm¹⁸ strōnōm połōżcie na formie do tartōw (jak taki niy mołcie,¹⁹ to sie wejście wiynkszoł forma na torta abo jako inkszo łokrōngłoł²⁰). Ta reszta ciasta, co wyłajzi²¹ ze formy, mogecie²² urwać i wkleić kaj²³ na środku- co sie moł²⁴ marnować. Tera wrołźcie tyn spodek do pieca na 15 minut.

Bez tyn czas²⁵ pokrōno wyndzōnka dejcie²⁶ na patelnia i niech sie fajnie podpiecze. Śmiytōnka ubijcie na piana, dociepcie dō ni jajca, trocha soli, pieprzu i gałki muszkatołowyj i wymiksujcie. Na sōm kōniec dociepcie tam jeszcze potarty syr.
Jak już spodek baje²⁷ podpieczōny, wciepcie na niego ta wyndzōnka, a po wiyrchu łoblyjcie śmiytōnkōm z jajcami i syrym. Dejcie na 20-25 minut do pieca na poczōntek na 200 stopni, a potyn- jakby sie za mocno brōnołciōło- mogecie zmniyjszyć na 190 i fertich.²⁸ Take tarty idzie jejś i na ciepło, i na zimno. Pokrejcie jōm, jak jake ciasto i… smacznego 🙂