Makrōłny luksusowe (Makaroniki… chyba ;) )

Jak sie gołdo¹ makrōłny² (choć niyftorzi pedzōm³ makrōny), ta zarozki⁴ mōmy przed ślypiami⁵ ôdpust⁶. No i joł tyż tak mōm, yno, że te makrōłny z ôdpustu to kole⁷ mandli⁸ nawet niy stoły, a joł sam narychtowoł⁹ cojsik, co to je ze samych mandli- te ôdpustowe tyż kejś¹⁰ narychtuja. Receptu¹¹ szukołech we blank¹² starych kochbuchach¹³ i we jednym, co moł¹⁴ już prawie sto lołt,¹⁵ żech go znod¹⁶. Niy podobało mi sie, że tam bōło za kans¹⁷ cukru i jeszcze chciała ta baba- bo to kobiyta napisała ta ksiōnżka- coby noprzōd na piecu miyszać mandle ze cukrym i biołkym. Mie sie niy chciało i bez¹⁸ to sam mołcie¹⁹ barzi²⁰ ajnfachowo²¹ wersja. Za starego piyrwy²² do tych makrōłnōw ôprōcz mandli dołwali tyż gorzke mandle, co to po prołwdzie²³ sōm we pestkach ôd moreli i majōm we składzie cyjanowodōr. Joł tam niy lubia sie truć i bez to żech doł yno arōmat ze tych gorzkich mandli- idzie taki kupić. A keby sie fto zastanołwioł, po czamu ône sie nazywajōm luksusowe, to niech sie skoczy do sklepu i ôbejrzi, po wiela sōm mielōne mandle 😉

Co potrza?

4 biōłka

100 g cukru

300 g mielōnych mandli

ździebko²⁴ soli

połra kapkōw²⁵ arōmatu ze gorzkich mandli

ôblaty- te take małe ôpłatki, ale jak ich niy mołcie, to mogecie kłajś makrōłny na papiōr do pieczynioł; joł sie je prziwiōz²⁶ z Niymiec, ale i we Polsce idzie take kupić

Biōłka ze ździebkym soli ubijcie ze cukrym na sztywno (moge to tyż być pudecuker²⁷). Potyn pomału wmiyszejcie do tego mandle ze arōmatym. Rozgrzyjcie sie bratruła²⁸ na 160 stopni. Na ôblaty abo na papiōr dołwejcie łyżkōm po trocha tyj masy. Jak już bajecie fertich²⁹, to wrojście to do bratruły na 20-25 minut, żeby sie leko przibrōnołciōły³⁰. Potyn już yno rozpusta… smacznego 🙂