Gibkoł zōłza ze rybōm- niy yno na piōntek ;) (Ekspresowy sos z rybą- nie tylko piątkowy)

Niy rołz, niy dwa mołcie^¹ jaki bezuch^² we piōntek^³ i zarozki sie robi problym, co by tu narychtować^⁴, bo przeca jakby jakymu Ślōnzokowi dać we piōntek miyso na stōł, to by jeszcze mōg^⁵ dostać hercszlag^⁶ i to byjście sie dopiyro narobiyli problymōw. Ta moja zōłza^⁷ je takoł barzi tajskoł, ale jak już fto sam czytoł połra receptōw, to wiy, że Chop to lubi mieć na talyrzu cołki świat 😉

Co potrza?

40-50 dkg ryby (joł mioł filet ze mintaja, ale mogecie dać i jakoł inkszoł ryba)

czerwnoł papryka

krauzka^⁸ pyndōw^⁹ ze bambusa

szklōnka zielōnego groszku (nojlepi mrożōnogo, ale jak niy mołcie, to moge być i ze biksy^¹⁰)

biksa mlyka kokosoweko

pynczek cebuli dymki

połra gałōnzkōw kolyndry

pó zaftu ze citrōłny

2 łeżki zielōnyj pasty curry (kebyjście ji^¹¹ niy mieli, to dejcie łeżeczka prziprawy curry, trocha chili, zetarto skōrka ze citrōłny, zaft niy ze poły, ale ze całyj citrōłny, zōmbek czosku, trocha imbiru, trocha potrzaskanych ziorkōw kolyndry i kminu rzymskego; takoł pasta moł dużo śwyżyj trołwy citrōłnowyj, a taki niy idzie kupić byle kaj, a do tego jeszcze moł i inksze rzeczy, co to mojōm charaktetystyczny smak, ale i bez ni idzie sie dać rada 😉 )

ździebko^¹² chili

2 łeżki masła klarowanego

2-3 łeżki oliwy

sōl i pieprz

Na sōm poczōntek na maśle klarowanym zeszklijcie pokrōno^¹³ cebula (ta ze dymki)- dejcie^¹⁴ do tego trocha soli, bo pōnojś^¹⁵ bez to zrobi sie jeszcze lepszoł. Potyn na chwila dociepcie do tego pokrōnoł papryka, niyskorzi^¹⁶ groszek, pyndy bambusa i dolyjcie tyż trocha oliwy. Zalyjcie to mlykym kokosowym i dejcie pasta curry, chili, sōl i pieprz ( jak niy mołcie pasty, to wciepcie te iksze składniki, co to żech je wypisoł trocha wyżyj). Jak już groszek sie baje^¹⁷ robiōł miynki, to wciepcie tam na chwila pokrōnoł na mańsze kōnski^¹⁸ ryba. I za połra minut zōłza mołcie fertich^¹⁹. Jak już baje na talyrzu, to posujcie^²⁰ jōm po wiyrchu^²¹ pokrōnōm dymkōm i kolyndrōm.